Ո՞վ առաջինը կբացահայտի ողջ ճշմարտությունը Փաշինյանի հակապետական քայլերի մասին

Վերջին օրերին մի շարք նախկին բարձրաստիճան պաշտոնյաների ակտիվացում է նկատվում: Նրանք հանդես են գալիս տարբեր քաղաքական-վերլուծական գրառումներով, իսկ ոմանք էլ Փաշինյանին բաց նամակներ են հղում՝ ցանկանալով ստանալ իրենց հուզող հարցերի պատասխանները:  Մինչդեռ, հենց հանրությունը ունի մի շարք հարցեր ուղղված այդ նախկին պաշտոնյաներին, ովքեր  պաշտոնից հեռացվելուց կամ ինքնակամ հեռանալուց առաջ և հետո բավականին լուրջ մեղադրանքներ են ուղղել վարչապետ Փաշինյանի հասցեին: Սակայն, այդ մեղադրանքները եղել են հպանցիկ և չեն բացվել այն փակագծերը, որոնց բացումը այսօր հրամայական է:

Դիցուք՝ ԱԱԾ նախկին պետ Արթուր Վանեցյանը հեռացավ զբաղեցրած պաշտոնից և հայտարարեց, որ կանգ առնելու ժամանակն է: Շաբաթներ անց, խոսելով լրագրողների հետ, ԱԱԾ նախկին պետը հայտարարեց, որ պաշտոնավարման ընթացքում վարչապետ Նիկոլ Փաշինյանից ապօրինի հրամաններ է ստացել:

Ցույցերին ամիսներ առաջ միացել է և նույնիսկ ճանապարհ էր փակում նախկին ոստիկանապետ Վալերի Օսիպյանը : Նա իր հերթին, մասնավորապես, հայտարարել էր ՝ «Ես ապօրինի հրաման ստացել եմ Նիկոլ Փաշինյանից, բայց չեմ կատարել»: Օսիպյանը չպատասխանեց, թե արդյոք դա է եղել իր հրաժարականի պահանջը:

ԱԳՆ նախկին նախարար Արա Այվազյանը, 2021 թվականի մայիսի 31–ին ելույթ ունենալով ԱԳՆ–ում, իր հրաժարականի դիմումը պատճառաբանել է հետևյալ կերպ. «Որպեսզի երբևիցե որևէ կասկած չլինի, որ այս նախարարությունը կարող է ինչ-որ քայլ անել կամ համաձայնություն տալ ինչ-որ գաղափարների, նախաձեռնությունների, որոնք մեր պետականության, մեր ազգային և պետական շահի դեմ են եղել»։ Դրանից հետո հայտնի դարձավ, որ ՀՀ գլխավոր դատախազությունը ՀՀ արտաքին գործերի նախկին նախարար Արա Այվազյանի՝ իր հրաժարականի պատճառների վերաբերյալ սկանդալային հայտարարության տեսագրությունն ուղարկել է ԱԱԾ՝ դրանում ներկայացված հանգամանքները ստուգելու և  ընթացքը լուծելու նպատակով:  Ստուգումները դեռ շարունակվում են, իսկ ինքը՝ Այվազյանն, այդպես էլ չի բացահայտել, թե հատկապես որ հարցերում է Փաշինյանը գործել ընդդեմ պետական շահի:

Արա Այվազյանի ակտիվությունը, կարծես թե, վարակիչ դարձավ նաև ԱԳՆ մեկ այլ նախկին նախարարի՝ Զոհրաբ Մնացականյանի համար: Վերջինս գրեթե ամեն օր հանդես է գալիս ծավալուն հոդվածներով կամ թվիթերյան գրառումներով: Ուշադրության են արժանի  ՀԱՊԿ-ին, Բելառուսին ուղղված քննադատությունը, ավելի մեղմ ձևակերպումներ պարունակող, այդուհանդերձ կրկին հակառուսական շեշտադրումներով վերջին հոդվածը, որը, ինչպես և նրա գրառումները, ինտենսիվ տարածվում էին իշխանական ԶԼՄ-ներով։ Մինչդեռ Զոհրաբ Մնացականյանի հրաժարականը նույնպես հարթ չէր ընթացել, այդ հրաժարականից հասկանալի էր դառնում, որ նա էլ չի կիսում Փաշինյանի հետպատերազմյան քաղաքականությունը և պետության համար այդտեղ որոշակի վտանգներ է տեսնում: Բայց, արի ու տես, որ հանրության հետ այդ վտանգներով կիսվելու նպատակահարմարություն Զոհրաբյանը չի տեսնում:

Ընդամենը երեկ էլ ՀՀ ԱԱԾ տնօրենի նախկին ժամանակավոր պաշտոնակատար Միքայել Համբարձումյանը դիմել է Նիկոլ Փաշինյանին՝ պահանջելով փաստեր ներկայացնել ԱԱԾ-ում գործակալների առկայության մասով՝ ընդգծելով, որ, ըստ էության, Փաշինյանը նաև իրեն է թիրախավորել: Միևնույն ժամանակ, Համբարձումյանը ակնարկում է, որ իր հրաժարականը կախված է եղել այն հանգամանքի հետ, որ ինքը չի հասկացել, թե ուր են տանում այս իշխանությունները Հայաստանը և Արցախը: ԱԱԾ պետի պաշտոնակատարը պարզապես չէր կարող չհասկանալ՝ թե ուր են գնում Հայաստանն ու Արցախը՝ իր ձեռքի տակ ունենալով ինֆորմացիայի անհրաժեշտ պաշարները: Այդ դեպքում՝ ինչո՞ւ Համբարձումյանը որպես արժանապատիվ սպա անկեղծ չի գտնվում հանրության հետ և չի խոսում բաց և թափանցիկ:

ՊՆ նախկին նախարար, այժմ ժամկետանց հրթիռների գործով կալանքի տակ գտնվող Դավիթ Տոնոյանը կալանավայրից պարբերաբար հոդվածներ է հրապարակում և հանդես է գալիս հարցազրույցներով, որոնցում ակնարկում է, որ Փաշինյանը բանակաշինության գործում ունեցած ձախողումները փորձում է բարդել իր վրա: Որո՞նք են այդ ձախողումները, ինչո՞ւ Տոնոյանը չի բացում փակագծերը, որպեսզի հանրությունը նույնպես իմանա՝ ինչում է ձախողել Փաշինյանը, ովքեր են այդ ձախողման իրական մեղավորները:

Այսինքն` պաշտոնաթող գեներալներն էլ, նախարարներն էլ հայտարարում են, որ պաշտոնը զբաղեցնելու ընթացքում վարչապետից ստացել են ոչ օրինական հրամաններ, սակայն դրանց մասին կխոսեն, երբ հասունանա պահը:  Հարց է առաջանում` իսկ ինչո՞ւ այսօր ընդդիմության դաշտ տեղափոխված նախկին բարձրաստիճան պաշտոնյաները հրապարակավ չեն բացահայտում, թե հատկապես ինչ ապօրինի հրամաններ են ստացել վարչապետից, հատկապես ինչ հակապետական քայլեր են նկատել նրա կողմից, չէ որ այդ բացահայտումը կարող է դառնալ քրեական գործի հարուցման հիմք և արդյունքում` նաև բերել Նիկոլ Փաշինյանի իշխանությունից հեռացնելուն: Արդյո՞ք այդ նպատակը չեն հետապնդում այսօր Երևանի փողոցներում բողոքի ակցիաներ իրականացնող ընդիմադիրները, եթե այո, ապա ինչու չի մերկացվում Փաշինյանի հակաօրինական պահվածքը, որը նա ցուցաբերել է ի պաշտոնե: Սա, թերևս, կլիներ ավելի տրամաբանական, քան վարչապետին և իշխող քաղաքական թիմին հեռանալու դեպքում հումանիտար միջանցք  խոստանալը....