Արցախում ժողովրդական ցասում է հասունանում․ արցախցի պատգամավորը փակագծեր է բացել

Տեղեկացրել ենք, որ հոկտեմբերի 8-ին և 9-ին, Ստեփանակերտում ինքնաբուխ հանրահավաքներ են տեղի ունեցել․ քաղաքացիները պնդում են՝ Արցախը չի կարող լինել Ադրբեջանի կազմում: Նրանք հանդիպում են պահանջել Արցախի նախագահ Արայիկ Հարությունյանի հետ, սակայն վերջինս, այդպես էլ չի հանդիպել ակցիայի մասնակիցներին։ Հայտնի է նաև, որ Արայիկ Հարությունյանի գլխավորած աշխատանքային պատվիրակությունը մտադիր է Երևանում ՀՀ ղեկավարության հետ քննարկել Արցախում ստեղծված իրավիճակը։

«Հոկտեմբերի 8-ին տեղի ունեցած հանրահավաքը ինքնաբուխ էր, մարդիկ սոցիալական ցանցերում գրառումներ էին արել՝ իրենց վրդովմունքն արտահայտելով Պրահայում տեղի ունեցած հանդիպումների և այնտեղ հնչած մտահոգիչ հայտարարությունների առթիվ»,- ԼՈՒՐԵՐ․ com-ին ասաց Արցախի ԱԺ «Արդարություն» խմբակցության պատգամավոր Մետաքսե Հակոբյանը։

Նրա խոսքով, այդ հավաքը կազմակերպիչներ չուներ, թեպետ նշեց, որ Ստեփանակերտի Վերածննդի հրապարակում ընթացող ակցիային մասնակցել են նաև «Հանուն Արցախի պաշտպանության» շարժման համակարգողները՝ շուրջ 200-300 հոգի։ 

«Հետագայում, հավաքը որոշ առումով դուրս եկավ վերահսկողությունից, քանի որ մարդկանց պահանջն առաջին հերթին ոչ թե իշխանությունների հեռացումն է որպես ինքնանպատակ, այլ արցախահայության իրական ու արդար պահանջների կատարումը։ Իսկ իշխանությունների հեռացումն արդեն քաղաքական որոշում է, և այդ իմաստով բնականաբար կլինեին որոշակի հավակնություններ ունեցող մարդիկ, և հնչեցվող պահանջներն արդեն անհատների պահանջներ էին»,-ասաց արցախցի պատգամավորը։

Մեր հարցին, թե արդյո՞ք առաջիկայում ևս Արցախում կլինեն բողոքի ակցիաներ, Մետաքսե Հակոբյանն ասաց․

«Իհարկե, կլինեն։ Շուտով կտեսենք «Հանուն Արցախի պաշտպանության» ժողովրդական շարժման հանրահավաքը, որն ունի հստակ ձևակերպած պահանջներ, որոնք առաջին կետով ուղղված են և՛ Արցախի, և՛ ՀՀ իշխանություններին։ Այդ պահանջները պետք է կատարվեն, իշխանությունները պետք է որոշեն, մնո՞ւմ են ժողովրդի կողքին և կատարում նրա պահանջները, թե՞ հեռանում են»։

Ինչ վերաբերում է Արայիկ Հարությունյանի գլխավորած պատվիրակության այցին և ՀՀ իշխանությունների հետ քննարկումներից ակնկալվող արդյունքներին՝ պատգամավորը նշեց, որ որևէ արդյունք չի ակնկալում, քանի որ այդ ձևաչափով նստել և ուղիղ բանակցել Նիկոլ Փաշինյանի հետ մանիպուլյացիա է լինելու․

«Երբևէ չենք ակնկալում, որ Նիկոլ Փաշինյանն անկեղծ կասի, թե ինչ կլինի Արցախի հետ կամ ինքն ինչ է պատրաստվում անել, ուստի, որևէ սպասում չունենք։ Մենք այլ կերպ ենք պատկերացնում մեր պահանջներն ու հանդիպումները»։

Արա Ալոյան