Ովքեր են «ջուրը թափել» 40 միլիարդանոց պահուստային ֆոնդը

Ընդամենը 3 ամիս առաջ՝ հունիսի 23-ին, Նիկոլ Փաշինյանը Կառավարության հերթական նիստում հպարտությամբ հայտարարեց, որ 40 միլիարդ դրամով ավելի հարկ են հավաքել. դա կուղղեն Կառավարության պահուստային ֆոնդ, հետո, ժամանակի ընթացքում, կտեղափոխեն պետական բյուջե։ Երեք ամիս անց, սակայն, պարզվում է, բյուջե տեղափոխելու համար էլ գումար չի մնացել, որովհետև Կառավարության պահուստային ֆոնդը սպառվել է։ Իսկ ովքե՞ր են սպառել այդքան մեծ ձեռքբերում ներկայացված պահուստային ֆոնդը: Պատերազմի շեմին կանգնած Հայաստանում Կառավարությունը միլիարդներ է հատկացնում մե՛կ փողոցների ասֆալտապատմանն ու լուսավորության ցանցի անցկացմանը, մե՛կ Ոստիկանությանը, որին վերջերս հատկացվել է 3 միլիարդ 609 միլիոն դրամ։

«Իրազեկ քաղաքացիների միավորում» ՀԿ Ստեփանակերտի գրասենյակին ու «Թրանսփարենսի ինթերնեշնլ» հակակոռուպցիոն կենտրոնին կառավարությունը 33 միլիոն 680 հազար դրամ գումար է հատկացրել՝ նույն այդ պահուստային ֆոնդից:

Հուլիսի 21-ի նիստում որոշվեց կառավարությանը պահուստային ֆոնդից 140 մլն դրամ հատկացնել: Որոշման հիմնավորման մեջ նշված էր, որ որոշման անհրաժեշտությունը պայմանավորված է նրանով, որ 2022 թվականի պետական բյուջեում արտասահմանյան պատվիրակությունների ընդունելությունների գծով ծախսերի ֆինանսավորման համար նախատեսված հատկացումներն անբավարար են: Նախագծով առաջարկվում է վերը նշված միջոցառման տարեկան ծախսերն ավելացնել 140.0 մլն դրամով, որից ինն ամսվա համամասնությունը՝ 80.0 մլն դրամով:

Կառավարության հուլիսի 28-ի որոշմամբ՝ ՀՀ վարչապետի, փոխվարչապետի եւ աշխատակազմի ղեկավարի՝ Կառավարական տուն 1 շենքի ընդունարաններ տանող վերելակը կփոխարինվի: Իբրեւ հիմնավորում նախագծում նշվել է, որ հին վերելակը ֆիզիկապես մաշված վիճակում է, հանգեցնում է վերելակի հաճախակի խափանումների եւ վթարների: ՀՀ վարչապետի աշխատակազմի վարչական շենքը սպասարկող նոր վերելակ ձեռք բերելու նպատակով Կառավարության պահուստային ֆոնդից 21 միլիոն 516 հազար դրամ է հատկացվել։ Վարչապետի աշխատակազմի ղեկավարը, ինչպես գիտենք, Արայիկ Հարությունյանն է:

31,6 մլն դրամ է հատկացվել Էկոնոմիկայի նախարարության երկու մասնաշենքերի 12 սանհանգույցների հիմնանորոգման համար: Վահան Քերոբյանի համար, անշուշտ, սա ամենակարևոր և օրակարգային խնդիրն էր, որ պետք է հապճեպ լուծում ստանար:

Այդ նույն պահուստային ֆոնդից միլիարդներ են ուղղվել պատգամավորների արտասահմանյան գործուղումների  վրա: Դիցուք՝  Ապրիլին գործուղումներ են եղել Փարիզ, Վաշինգտոն, Ստրասբուրգ, Բելգրադ, Սանկտ Պետերբուրգ։ Անվտանգության թեմաներով համաժողովին մասնակցելու համար ապրիլի 25-28-ը Ժնև են գործուղվել ԱԺ պաշտպանության հարցերի հանձնաժողովի նախագահ Անդրանիկ Քոչարյանն ու նրա օգնական Էմմա Սարգսյանը, Սարգիս Խանդանյանը, Արթուր Հովհաննիսյանը։ Ամենաուշագրավը՝ նաև պաշտպանության հանձնաժողովի փորձագետ Արծրուն Հովհաննիսյանը, ևս երկու փորձագետ: Մայիսի 5-ին ստորագրված կարգադրության համաձայն՝ Ավստրիայի մայրաքաղաք էին մեկնել ՔՊ-ական պատգամավորներ Գեւորգ Պապոյանը, Արուսյակ Մանավազյանը, Միքայել Թումասյանը: Օրինակ՝ մայիսի 26-28-ը Նիկոսիա (Կիպրոսի Հանրապետություն) էին մեկնել ԱԺ ՔՊ-ական պատգամավորներ Էդուարդ Աղաջանյանը, Մարիա Կարապետյանը, Հռիփսիմե Գրիգորյանն ու Սարգիս Խանդանյանը։ Հունիսի 6-9-ը Բեռն (Շվեյցարիայի Համադաշնություն) կմեկնեն Էդուարդ Աղաջանյանը, Հերիքնազ Տիգրանյանը եւ Քոչարյան Անդրանիկը։ 

Մսխվում է ոչ միայն պահուստային ֆոնդը, այլ նաև բուն բյուջեն: Ապշեցնում են Հայաստանի Հանրապետության 2022 թվականի պետական բյուջեի մասին օրենքով պլանավորված պարգևատրումների չափերը` ըստ պետական մարմինների (Պարգևատրումներ, ներառյալ դրամական խրախուսումներ և հատուկ վճարներ, ներառված չեն աշխատավարձերը և հավելավճարները): Օրինակ, ինչո՞վ է աչքի ընկել Ռոմանոս Պետրոսյանի ղեկավարած ՊՎԾ-ն, որպեսզի վերջինիս ղեկավարած կառույցին բաժին հասնի 138,421.700 դրամ: Նույն հարցը կարելի է ուղղել նաև ՀՀ վիճակագրական կոմիտեին, որին 2022-ին բաժին է հասել՝ 272,709,900 դրամ պարգևավճար: Սասուն Խաչատրյանի ղեկավարած հակակոռուպցիոն կոմիտեն, որը բառի բուն իմաստով պարապուրդի է մատնված, ըստ բյուջեի պետք է ստանա 186.940.000 դրամի պարգևվճար:

Դեկտեմբերի ընտրություններում Մեծամորի համայնքապետ ընտրված ՔՊ-ական Վահրամ Խաչատրյանը որոշել է բյուջեի հաշվին շքեղ ծառայողական մեքենա ձեռք բերել։ Խոսքը մոտ 32 մլն դրամ արժողությամբ «Տոյոտա Պռադո» ամենագնացի մասին է։

Պարզվում է՝ թանկարժեք ավտոմեքենաների հանդեպ թուլություն ունի նաև Իջեւանի համայնքապետ Արթուր Ճաղարյանը։ Նա դեռեւս համայնքապետի պաշտոնակատար եղած ժամանակ՝ 2021 թվականին, ձեռք է բերել «Տոյոտա Պռադո» մակնիշի ծառայողական ավտոմեքենա, այն դեպքում, երբ համայնքապետարանն ունեցել է մեկ այլ՝ մի քիչ ավելի ցածր դասի «Տոյոտա»։

Այսքանից հետո պարզից էլ պարզ է, թե ինչու ռազմավարական հարցեր լուծելու համար կառավարության պահուստային ֆոնդում և ընդհանրապես բյուջեում չեն բավարարում ֆինանսական միջոցները: Մինչդեռ, արի ու տես, որ բյուջեն անխնա մսխած ՔՊ-ականներն անգամ չեն էլ պատժվում 40 միլիարդը ջուրը թափելու համար...