Հայաստանն ու Ադրբեջանը համաձայնության են եկել խաղաղության պայմանագրի հիմնական կետերի շուրջ․ Չավուշօղլու

Ադրբեջանը և Հայաստանը պետք է մշտական խաղաղության պայմանագիր ստորագրեն: Կան հիմնական 5 կետեր, որոնք անհրաժեշտ է իրականացնել:

Այդ մասին TVNET հեռուստաալիքին տված հարցազրույցում ասել է Թուրքիայի արտգործնախարար Մևլյութ Չավուշօղլուն՝ արդյունավետ համարելով այդ հարցով վերջին բանակցությունները:

Նա նշել է, որ Թուրքիան անկեղծորեն ողջունում է Բաքվի ու Երևանի միջև հարաբերությունների բնականոնացումը: 

«Հայ ժողովրդի աջակցությունը Փաշինյանին նշանակում է, որ նրանք խաղաղություն են ուզում, բայց խաղաղություն չցանկացողների ձայներն ավելի ու ավելի են լսվում: Հայաստանը պետք է հասկանա, որ անհրաժեշտ է քայլեր ձեռնարկել հանուն կայուն խաղաղության»,-նշել է Չավուշօղլուն:

«Հիմնական կետերի շուրջ պայմանավորվածություն է ձեռք բերվել. դրանք հինգն էին: Դա ներառում է միմյանց տարածքային ամբողջականության ճանաչումը, սահմանների սահմանազատումը և այլն: Մնում է միայն դրանք իրականացնել։ Անկարայի՝ Երեւանի հետ հարաբերությունների կարգավորման գործընթացը եւ Բաքվի ու Երեւանի միջեւ խաղաղության պայմանագրի շուրջ բանակցությունները չեն կարող ընթանալ միմյանցից առանձին։ Սա Թուրքիայի «կարմիր գիծն է»։

Պրահայում Թուրքիայի նախագահ Թայիփ Էրդողանի և Հայաստանի վարչապետ Նիկոլ Փաշինյանի հանդիպումը դրական է եղել։ Սակայն պաշտոնական Երևանը ճնշումների է ենթարկվում ինչպես երկրի ներսում, այնպես էլ սփյուռքի կողմից»,-ասել է Չավուշօղլուն՝ Tvnet-ին տված հարցազրույցում։