Կիպրոսի նախագահը դատապարտել է ԵՄ-ի «երկակի ստանդարտներն» ու «հանդուրժողականությունը» Թուրքիայի նկատմամբ

Կիպրոսի նախագահ Նիկոս Անաստասիադեսը դատապարտել է Եվրամիության «երկակի ստանդարտները» եւ «հանդուրժողականությունը» Թուրքիայի նկատմամբ՝ պնդելով, որ դա մղում է Անկարային անտեսելու միջազգային իրավունքը եւ մայրցամաքում նոր հակամարտություն հրահրելու սպառնալիք է ստեղծում։

Euronews-ին տված հարցազրույցում Անաստասիադեսը կտրուկ քննադատել է Թուրքիայի գործողությունները եւ քննադատել է ԵՄ-ի իր գործընկեր առաջնորդներին այն բանի համար, որ նրանք Նիկոսիայի հետ իրենց համերաշխությունը «բառերով» են սահմանափակում։

Անաստասիադեսի խոսքով, ԵՄ-ի եւ Թուրքիայի միջեւ առկա բազմաթիվ քաղաքական եւ տնտեսական կապերը թույլ են տալիս երկրին պահպանել դաշինքին անդամակցության թեկնածուի կարգավիճակը՝ Անկարային մի տեսակ դիվանագիտական վահան տրամադրելով:

«Մենք [ԵՄ-ն] կարող ենք ասել, որ Ռուսաստանը խախտում է միջազգային իրավունքը, բայց երբ միջազգային իրավունքը խախտվում է թեկնածու երկրի կողմից՝ Եվրամիության մյուս անդամների հանդեպ, մենք ձեւացնում ենք, թե դա չենք հասկանում»,- ասել է Անաստասիադեսը: «Այդ հանդուրժողականությունն է, որ քաջություն է տալիս [Թուրքիային] եւ նոր հակամարտության վտանգ ստեղծում Եվրոպայում»։