Հայաստանը հայտնվել է հակամարտող ճամբարների կիզակետում և դա շատ վտանգավոր է․ Ստեփան Դանիելյան

Ռուսաստանը հայ-ադրբեջանական սահմանին ԵՄ քաղաքացիական առաքելությունը դիտարկում է որպես ԵՄ-ի փորձ՝ դուրս մղելու Մոսկվայի միջնորդական ջանքերն ու միջամտելու հարաբերությունների կարգավորմանը։ Այս մասին ճեպազրույցի ժամանակ հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

ԱՄՆ-ՌԴ մրցակցությանը զուգահեռ, Ռուսաստան-Եվրոպա հակասությունները ևս հատվում են մեր տարածաշրջանում, մասնավորապես՝ Հայաստանում։  Ի՞նչ սպասել այս խտացող տարաձայնություններից և արդյո՞ք հայկական կողմի համար ստեղծվում են աշխարհաքաղաքական իմաստով նոր հեռանկարներ։

«Ես շեշտը կդնեի Ռուսաստան-ԱՄՆ հակասության վրա։ Բնական է, որ Ամերիկան փորձում է Ռուսաստանին դուրս մղել տարածաշրջանից ու կտրել Իրան-Ռուսաստան Հայաստանով անցնող ցամաքային կապը, բայց խնդիր այն է, որ դրա համար Ամերիկան պետք է համագործակցի Թուրքիայի հետ, որովհետեւ Կովկասը շրջափակված է երեք մեծ երկրներով, դրանցից երկուսի դեմ գործելով, պետք է հենվի երրորդի վրա»,-ԼՈՒՐԵՐ․com-ին ասաց քաղաքագետ Ստեփան Դանիելյանը։

Ըստ մեր զրուցակցի, դրա համար Հայաստանում գործող արևմտամետներից ոմանք արդեն վերամասնագիտացել են թրքամետության մեջ ու դա տրամաբանական է։

Եվրոպան ինքնաբավ քաղաքական սուբյեկտ չէ, այն ԱՄՆ կցորդն է, նկատեց քաղաքագետը․

«Հայաստանը հայտնվել է հակամարտող ճամբարների կիզակետում և դա շատ վտանգավոր է։ Դրա համար Հայաստանի հեռանկարը մշուշոտ է և կախված է այդ որբերի փոխհարաբերություններից»։

Արա Ալոյան