ԱՄՆ-ն փորձում է հայ-ադրբեջանական բանակցություններն առաջ տանել իր օրակարգով, իսկ կողմերը դրան համաձայն են․ միջազգայնագետ

Միացյալ նահանգների պետքարտուղար Էնթոնի Բլինքենը օրերս Փաշինյանի հետ կայացած զրույցում կրկին կարևորեց Ադրբեջանի զորքերի դուրս բերումը ՀՀ ինքնիշխան տարածքից։ Ժամեր առաջ էլ ԱՄՆ պետդեպի խոսնակ Նեդ Փրայսը հայտարարեց, թե ԱՄՆ-ն առաջիկայում շարունակելու է ակտիվորեն ներգրավված մնալ Հայաստանի և Ադրբեջանի հետ հարաբերություններում՝ այդ թվում և ամենաբարձր մակարդակներով։
Ի՞նչ զարգացումներ սպասել այս համատեքստում, նաև հաշվի առնելով՝ ԵՄ քաղաքացիական առաքելության՝ Հայաստան ուղարկելու որոշումը։

«Միացյալ Նահանգները, օգտվելով բանակցային գործընթացում առաջացած վակուումից, բնականաբար, փորձելու է ներքաշվածություն ունենալ և բանակցությունները առաջ տանել իր առաջարկած օրակարգով։ Եվ կողմերը դրան համաձայն են, իսկ դա նշանակում է, որ պրոցեսը շարունակվելու է»,-ԼՈՒՐԵՐ․ com-ի հետ զրույցում ընդգծեց միջազգայնագետ Սուրեն Սարգսյանը։

Մոսկվան, ի դեպ, արդեն արձագանքել է ԵՄ որոշմանը՝ նշելով, թե դա համարում են Ռուսաստանին տարածաշրջանից դուրս մղելու և հայ-ադրբեջանական հարաբերությունների կարգավորման հարցում Կրեմլի ջանքերը նսեմացնելու փորձ:

Մեր այն հարցին՝ արդյոք Հայաստանը բեկումնային մարտահրավերի առջև է՝ արտաքին քաղաքական վեկտորը փոխելու իմաստով, միջազգայնագետն ասաց․

«Արտաքին քաղաքական վեկտորի փոփոխությունը բավականին բարդ է և դա միայն կախված չէ մեր որոշումից։ Միայն ներքին ցանկությունը բավարար չէ հասնելու նման որոշման կամ իրողության։ Այժմ համաշխարհային պրոցեսներ են տեղի ունենում և միայն դրանց տրամաբանության մեջ պետք է հասկանալ՝ արդյոք տեղի կունենա արտաքին քաղաքական վեկտորի փոփոխություն, թե՝ ոչ»։

Արա Ալոյան