Ինչու է ուշանում Ռուբեն Վարդանյանի նշանակումը. ովքե՞ր են դեմ

Շաբաթներ առաջ հայտնի դարձավ, որ ռուսաստանաբնակ մեծահարուստ Ռուբեն Վարդանյանը հրաժարվում է ՌԴ իր քաղաքացիությունից և տեղափոխվում է ապրելու և իր խոսքերով՝ արարելու Արցախի Հանրապետությունում: Դրանից հետո տեղեկություններ տարածվեցին, որ Արցախի նախագահ Արայիկ Հարությունյանը Ռուբեն Վարդանյանին առաջարկել է ստանձնել Արցախի պետական նախարարի պաշտոնը՝ պատրաստ լինելով նրան տրամադրել որոշումներ կայացնելու եւ գործելու լայն լիազորություններ: Ինքը՝ Վարդանյանը, հարցազրույցներից մեկում նշել էր, որ պատրաստ է ընդունել այդ առաջարկը և աշխատել ի շահ Արցախի բարեկեցության և անվտանգության:

Սակայն, ինչպես տեսնում ենք, Վարդանյանի նշանակումը հապաղում է, ինչո՞ւմ է խնդիրը: Որոշ տեղեկությունների համաձայն՝ Ռուբեն Վարդանյանին «որոշումներ կայացնելու եւ գործելու լայն լիազորություններ տրամադրելու» Արայիկ Հարությունյանի գաղափարը դժգոհությամբ է ընդունվել Մոսկվայում:

Այժմ, իրավիճակի տակից դուրս գալու նպատակով, ինքը՝ Վարդանյանը, հայտարարում է, որ թեև ստացել է նման առաջարկ, սակայն այդ առաջարկը դեռ քննարկման փուլում է: Մի շարք լրատվամիջոցներ էլ շրջանառության մեջ են դնում այն թեզը, որ Վարդանյանի նշանակումը կուշանա, քանի որ վերջինս անավարտ գործեր ունի «Ավրորա» հիմնադրամում: Թե ինչ գործեր կարող են լինել առավել կարևոր, քան ինչպես ինքը՝ Վարդանյանն էր ասում՝ Արցախը օրհասական վիճակից դուրս բերելը, դժվար է ասել:

Ինչպես երևում է՝ Արայիկ Հարությունյանի նախնական ծրագիրը, այն է՝ Վարդանյանին փաստացի Արցախի վարչապետի պաշտոն տալու միջոցով հասնել սեփական քաղաքական խնդիրների լուծմանը, այս փուլում ձախողվում է: Ակնհայտ է, որ Արցախի նախագահը չի ցանկանում բացահայտ առճակատման գնալ Մոսկվայի հետ, որը թերևս ունի Ռուբեն Վարդանյանին չվստահելու իր հիմքերն ու պատճառները:  Չմոռանանք, որ վերջինիս անվան հետ կապվող կուսակցության՝ «Ապրելու Երկրի» ամենակարկառուն անդամներից մեկը՝ Մանե Թանդիլյանը տարիներ առաջ բավական խոշոր դրամաշնորհներ էր ստանում հայտնի Սորոսի հիմնադրամից: Versia.ru կայքն էլ իր վերջին հոդվածներից մեկում ոչ ավել, ոչ պակաս Վարդանյանին «Արևմուտքի դեսպան» և «Պիտեր Դերբիի ժառանգ»  է անվանել՝ հարցադրում անելով, թե աշխարհաքաղաքական բարիկադների որ կողմում է այժմ Վարդանյանը պահում իր միլիարդները:

Արդյունքում՝ չի բացառվում, որ Վարդանյանը մոտ ժամանակներս ինքը մերժի Հարությունյանի առաջարկը՝ իհարկե այդ մերժումը հնարավորինս ճշմարտանման պատրվակով փաթեթավորելով...