Հայաստանը Ռուսաստանից ակնկալում է բազմաթիվ հարցերի պատասխաններ. Միրզոյանը՝ Լավրովին

Հայաստանի և Ռուսաստանի ԱԳ նախարարների այսօրվա հանդիպման ժամանակ նախարար Արարատ Միրզոյանն իր գործընկեր Սերգեյ Լավրովին ասել է, որ Հայաստանը բազմաթիվ հարցեր ունի, որոնց պատասխանները Երևանը ցանկանում է լսել Մոսկվայից։

«Հայկական կողմը հավատարիմ է Հայաստանի, Ռուսաստանի և Ադրբեջանի ղեկավարների մակարդակով եռակողմ հայտարարություններին։ Սակայն դրան զուգահեռ նկատվում է Ադրբեջանի ախորժակների աճ։ Եվ խոսքը ոչ միայն Լեռնային Ղարաբաղի, այլեւ Հայաստանի ինքնիշխան տարածքի մասին է։ Այս առումով Հայաստանը հստակ արձագանք է ակնկալում իր դաշնակից Ռուսաստանից»,-  ասել է Միրզոյանը՝ հավելելով, որ շատ երկրներ միջնորդություն են առաջարկում, բայց Հայաստանը ցանկանում է զգալ Ռուսաստանի թիկունքը։

Միաժամանակ Միրզոյանը հավելել է, որ ՄԱԿ-ի անդամ որոշ երկրների արձագանքը, որոնց հետ Երևանը բարեկամության այդքան երկար պատմություն չունի, Ադրբեջանի ագրեսիային արձագանքեցին ավելի հստակ հայտարարություններով, քան Ռուսաստանը։