«Հայաստանը պետք է տա իր տարածքները». Ադրբեջանի իշխող կուսակցության պատգամավորը հավակնություններ է հայտնել ողջ Հայաստանի նկատմամբ

Իշխող «Նոր Ադրբեջան» կուսակցությունից Ադրբեջանի խորհրդարանի պատգամավոր Էլման Մամեդովը հավակնություններ է հայտնել Հայաստանի ողջ տարածքի նկատմամբ, հաղորդում է Infoteka24.ru-ն։

««Այսօրվա «Հայաստան» կոչված պետության ողջ տարածքը մեր պատմական հողն է: Մենք կարող ենք հավակնել այդ տարածքին՝ ողջ Արևմտյան Զանգեզուրին, ինչպես նաև այլ շրջաններին»,- ադրբեջանցի պատգամավորի խոսքերն է մեջբերում Microscop Media-ն։

Պատգամավորը, ով չի թաքցնում Ադրբեջանի «ախորժակը», կարծում է, որ Հայաստանը պետք է զիջի իր տարածքները՝ որպես Ադրբեջանի դեմ «ռազմական հանցագործությունների փոխհատուցում»։

Հատկապես ուշագրավ է, որ նման պնդումներն արվում են տարածաշրջանում խաղաղություն հաստատելու Հայաստանի շարունակական ջանքերի ֆոնին։ Ադրբեջանն իր հերթին պարբերաբար սադրանքների է դիմում սահմանին, հրապարակում հայ գերիների սպանության ու խոշտանգումների տեսագրություններ, իսկ այժմ նաև պահանջում է, որ Հայաստանը պարզապես զիջի իր հողերը։

Ինչ վերաբերում է պատերազմական հանցագործություններին, ապա հենց Ադրբեջանն է նման հանցագործությունների գլխավոր մեղավորը, որոնք համաշխարհային խաղացողներն արդեն սկսում են ճանաչել՝ դատապարտելով ադրբեջանական զինուժի դաժան հանցագործությունները հայ զինվորականների և քաղաքացիական անձանց նկատմամբ։

Հենց Ադրբեջանի սադրիչ գործողություններն ու հայտարարություններն են ձգձգում խաղաղ համաձայնագրի ձեռքբերումը, քանի որ Բաքվին խաղաղություն պետք չէ։