Խաղաղության պայմանագիրը մի գործընթաց է, ԼՂ կարգավորման միջազգային մեխանիզմի ստեղծումը` մեկ այլ գործընթաց. ԱԽ քարտուղար

Խաղաղության պայմանագիրը մի գործընթաց է, Լեռնային Ղարաբաղի հիմնախնդրի կարգավորման միջազգային մեխանիզմի ստեղծումը մեկ այլ գործընթաց է: Այս մասին այսօր` հոկտեմբերի 12-ին, Հանրային հեռուստաընկերության եթերում ասել է ՀՀ Անվտանգության խորհրդի քարտուղար Արմեն Գրիգորյանը:

Հարցին, թե արդյոք այս մոտեցումը արձանագրված է եւ կողմերը համաձայն են արդյոք այսպես գնալ, ԱԽ քարտուղարն ասաց, որ իրենց ընկալումն այնպիսին է, որ իրենք այս ուղղությամբ են շարժվում:

«Եթե որեւիցե հավելյալ մոտեցումների փոփոխություն չլինի, այս տրամաբանությամբ պետք է առաջ շարժվենք»,- ասաց նա:

Անդրադառնալով ադրբեջանական կողմի ուղարկած ընդլայնված առաջարկներին խաղաղության պայմանագրի հետ կապված, Գրիգորյանն ասաց, որ այդ առաջարկները ՀՀ արտգործնախարարը ստացել Ժնեւում. «Մենք այս պահին աշխատում ենք այդ առաջարկի վրա եւ ես հույս ունեմ, որ շուտով մենք կպատասխանենք այդ առաջարկներին, եւ հնարավորություն կլինի հանդիպելու եւ քննարկելու այդ առաջարկները»:

Արմեն Գրիգորյանը նշեց, որ ադրբեջանական կողմի ընդլայնված առաջարկները նախկինում ներկայացված 5 սկզբունքների տրամաբանության մեջ են:

Արմեն Գրիգորանն ասաց, որ միջազգային հանրությունը միշտ էլ ասել է, որ իրենք հասկանում են, որ Հայաստանը կարող է առաջ շարժվել բոլոր բանակցություններում , եթե Հայաստանը համոզված լինի, որ Լեռնային Ղարաբաղում ապրող բոլոր հայերի համար ստեղծված են անվտանգության եւ իրավունքների պաշտպանության երաշխիքներ:

Անդրադառնալով ՌԴ ԱԳՆ   պաշտոնական ներկայացուցիչ  Զախարովայի այն հայտարարությանը, որ ՌԴ առաջարկն ավելի  հավասարակշռված է կողմերի համար, ԱԽ քարտուղարն ասաց, որ դեռ պետք է հասկանանք` արդյոք Բաքուն ընդունում է այդ առաջարկները, որ կարողանան առաջ շարժվել:

«Ռուսաստանը տարածաշրջանում ներկա է եւ ներկա լինելու իրենց նպատակը կայունություն եւ անվտանգություն  ապահովելն է: Մենք տեսնում ենք, որ հենց անցած տարի մայիսից սկսած Ադրբեջանը առնազն 3 լայնածավալ հարձակում է իրականացրել, եւ ես չեմ կարծում, որ տիկին Զախարովան չի  ուզում, որ Հայաստանի համար անվտանգության երաշխիքներ լինեն եւ իրենք  բազմիցս ասել են, որ հետաքրքրված են անվտանգությամբ եւ կայունությամբ եւ դրա համար ենք մենք հրավիրում Եվրոմիությանը, որպեսզի արձանագրենք, թե ով է` առաջինը հարձակվել եւ կարողանանք  կայունություն ապահովել եւ բացի դրանից նաեւ Ադրբեջանի զորքերը Հայաստանի տարածքից դուրս բերեն: Հայաստանը շարունակում է աշխատել այդ ուղղությամբ, բոլոր այն երկրները, որոնք կփորձեն աջակցել այս գործընթացին, կփորձենք աշխատել իրենց հետ»,-ասաց նա: