ԵԱՀԿ Մինսկի խումբը պետք է ԼՂ մնացած մասը ճանաչի որպես Հայաստանի տարածք․ լեհ քաղաքական գործիչ

Հակառուսական պատժամիջոցների համաշխարհային հրավառության ֆոնին հաճախ է հրապարակ նետվում այն տեսակետը, թե Հայաստանը, որպես ՌԴ դաշնակից երկիր, նույնպես կարող է ազդեցություն կրել այդ ամենից՝ ինչպես տնտեսական, այնպես էլ՝ աշխարհաքաղաքական իմաստով։ Աշխարհի ուժային կենտրոնների և արևմտյան երկրների պարագայում հատկապես շոշափելի է նրանց վերաբերմունքը թե՛ հայ-ադրբեջանական, թե՛ հայ-թուրքական հարաբերությունների ընթացիկ զարգացումների առնչությամբ՝ կրելով որոշակի յուրահատկություններ։

Հայաստանի ու Արցախի բարեկամ, լեհ քաղաքական գործիչ Թոմաշ Լեխ Բուչեկից հետաքրքրվեցինք, թե Լեհաստանը, որպես Հայոց Ցեղասպանությունը ճանաչած երկիր (2005 թ․) ինչպե՞ս է վերաբերվում հայ-թուրքական հարաբերությունների վերջին զարգացումներին, դրանք բնականոնացնելու ջանքերին։

«Լեհաստանում բոլորի հայացքն այսօր Ուկրաինայի վրա է: Հայաստանի և Թուրքիայի միջև դիվանագիտական ​​հարաբերությունները կարգավորելու փորձեր Լեհաստանում նկատելի չեն։ Լեհերն այժմ զբաղվում են ուկրաինա-ռուսական հակամարտությանն ավելի մոտ թեմաներով։ Լեհերը շատ քիչ հանրային իրազեկվածություն ունեն Հայաստանում և Լեռնային Ղարաբաղում (Արցախ) իրադարձությունների մասին, լեհերի մեծ մասը նույնիսկ չի գիտակցում, որ հայ-թուրքական սահմանը փակ է»,-ԼՈՒՐԵՐ․com-ին ասաց հայամետ գործիչը։

Նա նշեց, որ 1915 թվականի Հայոց ցեղասպանության հիշատակը ներկա է լեհերի մտքերում, քանի որ այն կարելի է կարդալ դպրոցների պատմության դասագրքերում։ Մեր այն դիտարկմանը, թե Ուկրաինայի հակամարտության հարցով Վարշավան կողմ է հակառուսական պատժամիջոցներին, այդ դեպքում ինչպե՞ս են գնահատում Լեհաստանում ԼՂ հարցով Կրեմլի միջնորդական ջանքերը։ Պատասխանելով հարցին՝ Բուչեկն ընդգծեց․

«Ռուսաստանի ձայնը ոչ մի տեղ չի լսվում Ուկրաինայում ագրեսիայի պատճառով. աշխարհը կառավարում է փողը, բիզնեսը և քաղաքականությունը։ Իմ կարծիքով, Ռուսաստանի միջնորդական ջանքերը կարող են վատթարացնել Լեռնային Ղարաբաղի հակամարտության կարգավիճակը, քանի որ Ադրբեջանն այն կօգտագործի որպես միջազգային իրավունքի խախտում՝ ռուսամետ «անջատողական» հանրապետությունները» ճանաչելու օրինակով»։

Մեր զրուցակցի համոզմամբ, ադրբեջանական դիվանագիտությունը Արցախի Հանրապետության հարցը ներկայացնում է որպես նույն քաղաքական իրավիճակ, ինչ Դոնեցկի Հանրապետությունը կամ Լուգանսկի Հանրապետությունը, այսինքն՝ աշխարհին ներկայացնում է որպես «ռուսամետ անջատողական հանրապետություն»․

«Իմ կարծիքով՝ ԵԱՀԿ Մինսկի խումբը չի կատարում իր միջնորդական դերը և պետք է վերածվի ավելի լավ կառույցի, որը նպատակաուղղված կլինի կայունացնել հայ-ադրբեջանական սահմանային իրավիճակը և ճանաչել Լեռնային Ղարաբաղի մնացած մասը որպես Հայաստանի տարածք։

Հայաստան՝ անկախ Ռուսաստանից»։

Արա Ալոյան