Ժողովուրդը պիտի հասկանա՝ ոչ ԱՄՆ է մեզ փրկելու, ոչ ՀԱՊԿ-ի վերանալով է բան փոխվելու․ մենք ենք մեր ճակատագրի տերը․ Հարութ Սասունյան

Մինչ ԵՄ-ն ու Մոսկվան վիճարկում են եվրոպական քաղաքացիական առաքելության և ՀԱՊԿ դիտորդական խմբի՝ Հայաստան ուղարկելու հարցը, ՀՀ ԱԽ քարտուղար Արմեն Գրիգորյանը երեկ հայտարարեց, թե մինչև տարեվերջ Ադրբեջանի հետ կնքվելու է խաղաղության պայմանագիր: Նա նշել է նաև, որ Վաշինգտոնում Սալիվանի և Հաջիևի հետ հանդիպման ժամանակ պայմանավորվածություն է ձեռք բերվել, որ մինչև տարեվերջ դելիմիտացիա է տեղի ունենալու։

Կարելի՞ է ասել, որ ԱՄՆ-ն առավել ակտիվ է գործում այս փուլում, քան՝  Ռուսաստանը՝ հաշվի առնելով նաև ՀՀ իշխանությունների՝ Մոսկվայից ունեցած որոշակի դժգոհությունները, նաև ՀԱՊԿ-ի մասով քննադատությունները։

«Այո, վերջին ամիսներին Ամերիկան ավելի ակտիվ է կովկասյան հարցերով, սակայն մեր ժողովուրդը չպետք է չափազանց խանդավառվի, թե ԱՄՆ գալու է՝ մեզ փրկելու։ Մեր հազարավոր տարիների պատմության ընթացքում ոչ մեկը երբեք դրսից չի եկել և մեզ փրկել։ Միայն մենք պետք է մեզ փրկենք, մի բան, որ մենք չենք հասկանում, որովհետև մենք զգացական ժողովուրդ ենք և տարվում ենք սին երազներով»։

Այս մասին ԼՈՒՐԵՐ.com-ի հետ զրույցում նշեց «Կալիֆոռնիա Կուրիեր» («The California Courier») թերթի գլխավոր խմբագիր և հրատարակիչ Հարութ Սասունյանը։ Նրա համոզմամբ, ոչ մի բան չի փոխվելու, եթե ՀԱՊԿ-ը վաղը վերանա․ ըստ Սասունյանի՝ այդ դեպքում, հավանաբար, ավելի վատ կացության մեջ հայտնվենք։

Մեկնաբանելով Նիկոլ Փաշինյանի՝ Պրահայում Ալիևի ու Էրդողանի հետ կայացած հանդիպումներից հետո հանրության շրջանում ի հայտ եկած մտահոգություններն ու խաղաղության պայմանագրի ստորագրման շուրջ որոշակի մտավախությունները, ամերիկահայ գործիչը նշեց․ 

«Ամերիկահայությունը և Հայաստանի մեր ժողովուրդը հասկանում են, որ Փաշինյանը, ինչպես միշտ էլ հայտարարել է նոյեմբերի 10-ի կապիտուլյացիայից հետո, պատրաստվում է շատ ավելի մեծ կապիտուլյացիայի՝ հանձնելով ոչ միայն Արցախի մնացյալ մասը, այլև Հայաստանը։ Շատ ցավալի է, որ Փաշինյանն անընդհատ երազում է խաղաղության դաշնագիր ստորագրել մեր արյունարբու թշնամիների հետ, երբ նրանք ծրագրում են մեզ վերացնել։ Ինչպե՞ս կարելի է խաղաղություն կնքել մի երկրի հետ, որն ամեն օր հարձակվում է Հայաստանի և Արցախի վրա, գրավում է հողերը, սպանում և առևանգում է մեր զինվորներին, երկու տարի է՝ պահում է հայ գերիներին»։

Սասունյանն աբսուրդ համարեց այդպիսի խաղաղությունը՝ նշելով, որ միայն ստրկացած ղեկավարը կարող է այդպիսի ստորացուցիչ դաշնագիր ստորագրել՝ անտեսելով մեր ազգային շահերը։ 

Արա Ալոյան