Արցախի ապառազմականացման՝ Բաքվի պահանջը՝ Փաշինյանի և Ալիևի պայմանավորվածության հետևանք է․ Էդգար Ղազարյան

Ի թիվս Հայաստանին ներկայացվող պահանջների՝ Ադրբեջանը շարունակում է պնդել Արցախի ապառազմականացումը, իսկ զինաթափել Արցախը՝ կնշանակի հանձնել Արցախը։ 

«Արցախի ապառազմականացման և Արցախի Պաշտպանության Բանակի լուծարման մասին որևէ խոսք չկա որևէ գրավոր փաստաթղթում։ Արցախում Հայաստանից ժամկետային զինծառայողների ծառայության, սպառազինությունների մատակարարման և Արցախի Պաշտպանության Բանակի կարողությունների ամրապնդման վերաբերյալ որևէ սահմանափակում չի նախատեսում 2020 թվականի նոյեմբերի 9-ի և դրանից հետո ստորագրված հայտարարությունները։ Դա Նիկոլ Փաշինյանի և Իլհամ Ալիև բանավոր պայմանավորվածությունների հետևանք է»,-ԼՈՒՐԵՐ․ com-ի հետ զրույցում նման տեսակետ հնչեցրեց Լեհաստանում ՀՀ նախկին դեսպան Էդգար Ղազարյանը։ Ընդդիմադիր գործչի պնդմամբ, դա ոչ միայն դավաճանական գործարք է հայկական կողմից, այլև՝ ուղիղ սպառնալիք Արցախում ապրող մեր հայրենակիցների համար։ 

«Ավելին, Ալիևը պահանջում է ոչ միայն Արցախի, այլև Հայաստանի ապառազմականացում, քանզի Ադրբեջանի արտաքին գործերի նախարարութան կողմից մշակված հինգ սկզբունքային կետերը, որոնց վրա հիմնվելով մշակվում է այսպես կոչված խաղաղության համաձայնագիրը, իր մեջ բովանդակում է սպառազինությունների նկատմամբ վերահսկողություն նաև Հայաստանի համար։ Սա կործանարար գործընթաց է, որը պետք է կանգնեցել հնարավոր ցանկացած միջոցներով»։

Ըստ մեր զրուցակցի՝ Արցախն Ադրբեջանին հանձնելու Փաշինյանի պատրաստակամությունն արտահայտվում է ոչ միայն դրանով, այլև իր հրապարակային այլ հայտարարություններով, այդ թվում 2022 թ․ հոկտեմբերի 6-ի Պրահայի քառակողմ հայտարարությամբ։ Ինչ վերաբերում է ԵՄ և ՀԱՊԿ դիտորդական առաքելությունների՝ ՀՀ ուղարկելուն, Ղազարյանը նշեց․

«Նախ` եվրոպական Միության, ՀԱՊԿ-ի կամ այլ դիտորդական առաքելություններն ունեն սկզբունքորեն տարբեր նպատակներ, խնդիրներ, մանդատ և հնարավորություններ։ Այս պահին պայմանավորվածություն և որոշում գոյություն ունի միայն ԵՄ քաղաքացիական դիտորդների տեղակայման մասին, որոնք զինվորականներ չեն, չեն տեղակայվելու սահմանի ողջ երկայնքով, չունեն որևէ ռազմական գործողություն կանխելու հնարավորություն։ Ընդ որում, խոսքը վերաբերվում է ոչ թե Արցախի, այլ միայն Հայաստանի տարածքում նրանց տեղակայմանը։ Անգամ Ադրբեջանը համաձայնություն չի տվել իր տարածքում այդ դիտորդների տեղակայմանը։ Այսինքն, նրանք ժամանելու են ոչ թե անվտանգային խնդիրներ լուծելու, այլ՝ Հայաստանի համար վերջնական կապիտուլյացիա ազդարարող պայմանագրի մշակման հարցում Ադրբեջանին աջակցություն ցուցաբերելու նպատակով։

ՀԱՊԿ-ի դիտորդների ժամանման համար անհրաժեշտ է ՀԱՊԿ-ի Հավաքական անվտանգության խորհրդի որոշումը, ինչը դեռ չի կայացվել, այն դեպքում, երբ այդ կազմակերպությունը և խորհուրդը ղեկավարում է Հայաստանը»,- ընդգծեց քաղաքական գործիչը։

Արա Ալոյան