Գրիգոր Բեքմեզյանի լիազորությունները դադարել են

ԲԴԽ անդամ Գրիգոր Բեքմեզյանի լիազորությունները դադարել են՝ հրաժարականի դիմումի հիման վրա։

Հիշեցնենք, որ Գրիգոր Բեքմեզյանը հոկտեմբերի 10-ին հրաժարականի դիմում է ներկայացրել։ Նա ֆեյսբուքյան գրառում էր կատարել՝ նշելով, որ Բարձրագույն դատական խորհուրդը այլևս այն խորհուրդը չէ, որը նախատեսված է Սահմանադրությամբ և Դատական օրենսգրքով։
«Ցավոք, վերջին մեկ շաբաթվա գործընթացները, ներառյալ այսօրը, ինձ համար հիմնովին ապացուցեցին, որ Բարձրագույն դատական խորհրդի անկախության մասին իմ և Խորհրդի անդամների մեծամասնության պատկերացումները իրար չեն համապատասխանում։

Վերլուծելով վերջին մի քանի ամսվա իրադարձությունները, նաև վերջին մեկ շաբաթվա գործընթացները՝ համոզվեցի, որ Բարձրագույն դատական խորհուրդը այլևս այն խորհուրդը չէ, որը նախատեսված է Սահմանադրությամբ և Դատական օրենսգրքով։ Իհարկե, ես կարող էի մնալ և շարունակել պայքարը Խորհրդի և դատական իշխանության անկախության համար, բայց գործընկերներիս մեծամասնության իներտությունը և նրանց կողմից աջակցության բացակայությունը ինձ հուշում են, որ ես այլևս Խորհրդում անելիք չունեմ։ Խորհրդի անդամի երդումը հնարավորություն չի տալու ազատորեն բարձրաձայնել առկա խնդիրների մասին, ուստի իմ պարտքը համարելով մշտապես պայքարել դատական իշխանության անկախության համար՝ ես որոշեցի դա անել Խորհրդից դուրս, ինչը ինձ ավելի շատ ազատություն կտա և, գուցե, ավելի մեծ հնարավորություն՝ կանխելու այն բացասական գործընթացները, որոնք տեղի են ունենում դատական իշխանությունում»,- ֆեյսբուքյան իր էջում գրել էր Բեքմեզյանը։

Գրիգոր Բեքմեզյանի լիազորությունները համարվել են դադարած հոկտեմբերի 11-ից, սակայն հայտարարությունը ԲԴԽ պաշտոնական կայքում հրապարակվել է միայն այսօր։

Ի դեպ, Գրիգոր Բեքմեզյանի հրաժարականից ընդամենը մի քանի օր առաջ ԲԴԽ նախագահ է ընտրվել ՀՀ արդարադատության նախկին նախարար Կարեն Անդրեասյանը։