«Բանակցությունների ընթացքում ադրբեջանական կողմը բարձրացրել է նաև Ղազախի շրջանի յոթ և Նախիջևանի մեկ գյուղի հարցը». Հաջիև

Ադրբեջանի նախագահի խորհրդական Հիքմեթ Հաջիևը հայտարարել է, որ Վաշինգտոնում բանակցություններն ընթացել են նախապես համաձայնեցված օրակարգին համապատասխան, որը կառուցվել է բրյուսելյան ձևաչափի կանոնների համաձայն։ Բանակցություններն ընդգրկել են հետևյալ ոլորտները.

- Խաղաղության պայմանագիր,

- Սահմանների սահմանազատում,

- Կոմունիկացիաների վերականգնում.

- Մարդասիրական հարցեր, ներառյալ անհետ կորածների հետ կապված իրավիճակը և ականների խնդիրը։

«Վաշինգտոնում և այլուր տեղի ունեցած բանակցությունները հետևել են Բրյուսելի օրակարգին և կենտրոնացել բացառապես խաղաղության խնդիրների վրա։ Վաշինգտոնում որոշվել է, որ պետք է բանակցություններ վարել խաղաղության պայմանագրի կնքման կոնկրետ ժամկետների սահմանմամբ։ Այդ կապակցությամբ խաղաղության պայմանագրի նախագիծը նախապես ներկայացվել է Ժնևում կայացած Ադրբեջանի և Հայաստանի արտգործնախարարների հանդիպմանը։

Ուզում եմ ընդգծել, որ նախագծում ներառվել են երկու երկրների միջև հարաբերությունների կարգավորման վերաբերյալ նման համաձայնագրերում պարունակվող ստանդարտ դրույթները։ Մասնավորապես, խաղաղության պայմանագիրը ենթադրում է ինքնիշխանության և տարածքային ամբողջականության փոխադարձ ճանաչում, ներքին գործերին չմիջամտություն և այլն։

Ինչպես ընդգծել է նախագահ Իլհամ Ալիևը, եթե Հայաստանը դրսևորի քաղաքական վճռականություն, ապա խաղաղության պայմանագիրը կարող է ստորագրվել մինչև այս տարվա վերջ։ Մեր երկրների միջև խաղաղության պայմանագրի ստորագրումը, անշուշտ, բարենպաստ ազդեցություն կունենա տարածաշրջանի ընդհանուր աշխարհաքաղաքական մթնոլորտի վրա։

Սահմանազատման հարցում մեր դիրքորոշումն այն է, որ այս գործընթացը պետք է իրականացվի առանց կանխորոշված ​​պայմանների։ Այսինքն՝ նման մոտեցումը, որում նախապես հայտնի է հանձնաժողովների աշխատանքի արդյունքը, մեզ համար անընդունելի է թվում։ Պետությունների միջև սահմանների քննարկման փորձը, որն առկա է համաշխարհային պրակտիկայում, ներառյալ այդ հարցի շուրջ բանակցությունների փորձը հենց Ադրբեջանի և հարևան երկրների միջև, ցույց է տալիս, որ սահմանազատումը շատ բարդ գործընթաց է, որը ներառում է երկարաժամկետ ինտենսիվ բանակցություններ։ Այստեղ ամենակարևորը սկզբնական դրույթների սահմանումն է, որոնց հիման վրա ընթանալու են բանակցությունները։

Ինչպես գիտեք, խոսքն Ադրբեջանի և Հայաստանի միջև հազար կիլոմետրից ավելի չսահմանազատված սահմանի մասին է, և այդ սահմանի մի մասը գրեթե 30 տարի գտնվում էր հայկական օկուպացիայի տակ։ Բանակցությունների ընթացքում ադրբեջանական կողմը բարձրացրել է նաև Ղազախի շրջանի յոթ և Նախիջևանի մեկ գյուղի հարցը, որոնք դեռ օկուպացված են»,- ասել է նա՝ շարունակելով անհիմն մեղադրանդներ հնչեցնել հայկական կողմի հասցեին։