Պրահայի հայտարարությունը կլինի Երևանի և Բաքվի միջև խաղաղության պայմանագրի հիմքը. Բայրամով

Պրահայի հայտարարությունը հիմք է դառնալու Երևանի և Բաքվի միջև խաղաղության պայմանագրի համար։ Այս մասին Աստանայում ռուս և հայ գործընկերների հետ հանդիպման արդյունքներով հայտարարել է Ադրբեջանի արտգործնախարար Ջեյհուն Բայրամովը։ Նա հանդիպմանն ընդգծել է, որ Բաքուն հոկտեմբերի 2-ին (Ժնևում) Երևանին է հանձնել խաղաղության պայմանագրի հիմնական տարրերը և ներկայումս սպասում է հայկական կողմից պատասխանին, գրում է Interfax-ը։

Նրա խոսքով, հոկտեմբերի 6-ին Պրահայում Ադրբեջան-Հայաստան-Ֆրանսիա-ԵՄ քառակողմ հանդիպման ժամանակ Բաքուն և Երևանը «հայտարարել են միմյանց տարածքային ամբողջականության փոխադարձ ճանաչման մասին, և դա կդառնա խաղաղության պայմանագրի հիմքը»։

Նա նաև նշել է Հարավային Կովկասում հաղորդակցությունների ապաշրջափակման ուղղությամբ գործնական աշխատանքներ սկսելու կարևորությունը։ Նա նաև հայտարարել է, որ Ադրբեջանը «հայ-ադրբեջանական սահմանի սահմանազատման գործընթացում կոնկրետ գործողությունների կողմնակից է, որի վերաբերյալ հանձնաժողովի երրորդ նիստը տեղի կունենա մոտ ապագայում»։