Շուտով 150.000 դոլարի դիմաց թուրքերը կկարողանան դառնալ ՀՀ քաղաքացի և մասնակցել ընտրության․ իրավագետն ահազանգում է

Շուտով ընդամենը 150.000 դոլարի դիմաց թուրքերը կկարողանան դառնալ ՀՀ քաղաքացի և մասնակցել ընտրության, այսինքն թուրքերը արդեն օրինական տարբերակով և առանց որևէ ՀԿ-ների ու ֆոնդերի ֆինանսավորման, կկարողանան ՀՀ-ում ղեկավար ընտրել: Օրենսդրական այս նախագիծը արդեն իսկ  ՀՀ Ոստիկանության կողմից ներկայացվել է կառավարությանը:

Այս մասին ահազանգել է իրավագետ Վահե Գրիգորյանը։ Նրանից հետաքրքրվեցինք, թե կոնկրետ ի՞նչի մասին է խոսքը և որքա՞ն լուրջ է մտավախությունը։

«ՀՀ կառավարությանն է ներկայացվել Ոստիկանության կողմից մշակված «Քաղաքացիության մասին» օրենքի նախագիծը, որով նախատեսվում է պարզեցնել, հեշտացնել ՀՀ քաղաքացիություն ձեռք բերելու ընթացակարգը, մասնավորապես՝ նախատեսվում է սահմանել, որ 150,000 ԱՄՆ դոլար ներդրում կատարելու դիմաց ՀՀ քաղաքացիություն չունեցող և ծագումով ոչ հայ անձինք կարող են ձեռք բերել ՀՀ քաղաքացիություն»,-ԼՈՒՐԵՐ․ com-ին ասաց իրավագետը։

Ըստ նրա, մտավախությունն այն է, որ հաշվի առնելով Ադրբեջանի և Թուրքիայի տնտեսական պոտենցիալը՝ նրանք կունենան անչափ հեշտ և շատ էժան հնարավորություն՝ ստանալու ՀՀ քաղաքացիություն և ապա ուղղակիորեն հետագայում ազդել Հայաստանում որևէ իշխանության ձևավորման վրա։

Մեր այն հարցին, թե օրինագծի կասեցման ի՞նչ մեխանիզմներ կան, այդ թվում՝ հանրային ճնշման և այլն, Վահե Գրիգորյանն ասաց․

«Կասեցման մեխանիզմներից մեկն այն է, որ այդ օրենսդրական նախագիծը մերժվի Ազգային ժողովի կողմից, կամ նախագծում կատարվի փոփոխություն և բացառվի այն երկրների քաղաքացիների ՀՀ քաղաքացիություն ստանալը, որ Հայաստանի հանրապետության հետ չունեն դիվանագիտական հարաբերություններ, օրինակ՝ Թուրքիան, Ադրբեջանը, եթե չեմ սխալվում՝ Պակիստանը»։

Հակազդելու ճանապարհներից մեկն էլ, ըստ իրավագետի, օրենքի ընդունվելու դեպքում դրա վիճարկումն է Սահմանադրական դատարանում։

Արա Ալոյան