Երևանի կենտրոնում կանաչապատման ծառայության առջև պետք է դրվի երկու այլ խնդիր․ Խաժակյանը կոնկրետ առաջարկ ունի

Ցավալի է, բայց վերջին տարիներին Երևանը կանաչ ու վարդագույն քաղաքից վերածվել է քարակերտ ոստանի՝ քաղաքաշինական նորմերի կոպտագույն խախտումներով, առանձին դեպքում՝ հանրային գերակա շահի ստորադասմամբ և այլ խնդրահարույց երևույթներով։ 

Մայրաքաղաքի կանաչ տարածքների խնդիրը մշտապես արդիական է․ դրա կարևորության մասին խոսում են գրեթե բոլորը, գործով նպաստում խնդրի լուծմանը՝ շատ քչերը։ 

«Խորհրդային միության փլուզումից հետո Երևանում հատվել են բազմաթիվ կանաչ տարածքներ, ինչն իր հերթին բերել է էկոլոգիական խնդիրների: Ժամանակն է, որպեսզի մենք կարողանանք վերականգնել քաղաքի թոքերը՝ այն է՝ մեծ մակերեսով երբեմնի կանաչ տարածքների վերականգնումը: Սա մեր այն ծրագրային դրույթներից է, որի մասին խոսում ենք դեռևս 2017 թվականից ԵԼՔ դաշինքի շրջանակներում»:

Այս մասին ԼՈՒՐԵՐ․ com-ի հետ զրույցում նշեց Երևանի ավագանու «Լույս» խմբակցության ղեկավար Դավիթ Խաժակյանը։

Նրա խոսքով, Երևանի կենտրոնում կանաչապատման ծառայության առջև պետք է դրվի երկու այլ խնդիրներ՝ էսթետիկ տեսքի ապահովում և քաղաքի «փայլի» վերականգնում, ինչպես նաև ֆունկցիոնալ կանաչապատում:
 
«Առաջինը փոքրիշատե հասկանալի խնդիր է, երկրորդը  հստակ ծառատեսակների և թփերի ընտրությունն է, որոնք ֆունկցիոնալ խնդիրներ կլուծեն՝ աղմուկի և փոշու կլանում, փողոցի և մայթի սահմանազատում և այլն: Եվ իհարկե այս ամենը չի կարող լինել առանց ոռոգման ցանցի համալրման և արդիականացման»,-ընդգծեց Խաժակյանը:

Արա Ալոյան