Ալիևն ու Ռաիսին թեժ վեճ են ունեցել միմյանց հետ Աստանայում․ անդրադարձել են նաև Հայաստանին

Լիբանանյան kataeb.org պորտալն իր հրապարակման մեջ ներկայացրել է Աստանայում Իրանի և Ադրբեջանի նախագահների հանդիպման հետաքրքիր մանրամասներ։

Այս համատեքստում կայքի աղբյուրը, ով ուղեկցել է Ռաիսիին Ղազախստան կատարած այցի ժամանակ, ասել է, որ Իբրահիմ Ռաիսիի և Իլհամ Ալիևի հանդիպումը բարեկամական մթնոլորտում չի անցել, ավելին՝ երկու ղեկավարների միջև վեճ է եղել։

Վեճը ծագել է այն բանից հետո, երբ Ալիևը քննադատել է իրանական ուժերի կուտակումն Ադրբեջանի հետ սահմանին և այն որակել որպես սպառնալիք Բաքվի անվտանգությանը։

Ալիևը նաև կտրուկ է արձագանքել, երբ Ռաիսին պատասխանել է, թե ուժերը տարածք են ուղարկվել ոչ թե զվարճանքի կամ վարժանքների համար, այլ անվտանգություն և կայունություն հաստատելու, ինչպես նաև ցանկացած ծրագրի դեմ պայքարելու համար, որն ուղղված է Իրանի և Հայաստանի միջև սահմանը փոխելուն կամ կտրելուն։

Ալիևը Ռաիսիին մեղադրել է Ադրբեջանին դիմակայելու համար Հայաստանին զինելու և ռազմական օգնություն ցուցաբերելու մեջ։ Ռաիսին հերքել է այդ մեղադրանքները՝ իր հերթին Ալիևին մեղադրելով «սիոնիստներին» ենթարկվելու մեջ։ Իրանի նախագահը քննադատել է նաեւ Իսրայելի պաշտպանության նախարարի այցը Բաքու։

Նշվում է նաև, որ իրանցի առաջնորդը ադրբեջանցի գործընկերոջը մեղադրել է Իրանում բողոքի ակցիաների ֆոնին ադրբեջանցի անջատողականներին աջակցելու մեջ։