Խնդիրը սխալ ուտելու մեջ է, ոչ թե քիչ ուտելու. պետության կողմից հատուկ սննդակարգ կկազմվի. Քերոբյան

Պարենային անվտանգությունը պետք է ուղղված լինի ոչ թե անհրաժեշտ քանակի սննդամթերքով Հայաստանն ապահովելուն, այլ նաեւ ճիշտ սնվելուն: Այս մասին այսօր՝ հոկտեմբերի 19-ին, լրագրողների հետ զրույցում նշեց էկոնոմիկայի նախարար Վահան Քերոբյանը:

«Օրինակ, մինչեւ 2 տարեկան երեխաների պարագայում մենք տեսնում ենք, որ խնդիրը ոչ միայն թերսնվելն է, այլ նաեւ սխալ սնվելը, որի արդյունքում երեխաբների զգալի մասը, ավելի քան 40 տոկոսը, ունեն թերսնվածություն: Դա եւ  քիչ սնվելուց է, եւ սխալ սնվելուց:

Շատ հաճախ տեսնում ենք, որ խնդիրը սխալ ուտելու մեջ է, ոչ թե քիչ ուտելու մեջ: Թերսնված երեխաները նաեւ բարեկեցիկ ընտանիքներում են շատ, որովհետեւ մարդիկ պարզապես չգիտեն, թե ինչպես պետք է ճիշտ կերակրել  երեխային»,-ասաց նա:

Քերոբյանը տեղեկացրեց, որ  պետության կողմից պետք է հատուկ սննդակարգ կազմվի. «Մենք դա անելու ենք: Հիմա պարենային ռազմավարությունը կազմվում է, կարծում եմ՝ մինչեւ տարվա վերջ արդեն կունենանք ընդունված ռազմավարությունը, որի մեջ արդեն ճանապարհային քարտեզով նշված կլինի, թե ինչը երբ պետք է արվի:

Մենք պետք է ընդամենը առաջարկենք, որը ենթադրում է լայնածավալ ուսուցողական, լուսաբանման աշխատանքներ, որպեսզի մարդիկ ավելի շատ բան իմանան ճիշտ սնվելու մասին: Մենք կենտրոնանում ենք միայն փոքր տարիքի երեխաների վրա»,-ընդգծեց նախարարը: