«Մերժված» Սինանյանն այժմ էլ լծվել է կոռուպցիոն ռիսկերի ավելացմանը

Այս տարի հոկտեմբերի 28-31-ը Զարեհ Սինանյանի ղեկավարած Սփյուռքի գործերի գրասենյակը կազմակերպելու և իրականացնելու է համահայկական համաժողով, որին, ի դեպ, չեն մասնակցելու Հայ առաքելական եկեղեցու թեմերը, սփյուռքի մի շարք առանցքային կազմակերպություններ: Այս ամենը, իհարկե, լավագույն ցուցիչն է այն բանի, թե ինչպես է պաշտոնավարման ընթացքում Զարեհ Սինանյանը խթանել Հայաստան-սփյուռք հարաբերությունները և ինչ բարձրագույն մակարդակի վրա են դրանք այժմ գտնվում:

Սակայն, խոսքը այսօր այն բանի մասին է, թե ինչպիսի կայսերական ծախսեր է նախատեսում անել Սինանյանը, այդ մերժված համաժողովը կազմակերպելու նպատակով: 4.5 տարվա ընթացքում առաջին անգամ կազմակերպվող այս միջոցառման համար պետական բյուջեից հատկացվելու է մոտ 309 միլիոն դրամ (308,904.9 հազար ՀՀ դրամ), իսկ բոլոր գնումները կատարվելու են հրատապ՝ մեկ անձից։

Անհասկանալի է, թե ինչու հրատապ, ի վերջո երեկ չէ, որ Սինանյանի գրասենյակը իմացել է, թե ինչ համաժողով է իրեն վստահված կազմակերպել: Տպավորություն է ստեղծվում, որ Սփյուռքի գործերով գլխավոր հանձնակատարի գրասենյակը պարզապես որոշել է հետ չմնալ մյուս գերատեսչություններից և զարկ տալ կոռուպցիոն ռիսկերին, քանի որ մեկ անձից, այն էլ առանց նույնիսկ բանկային երաշխիքի նման գնումներ անելը ոչ այլ ինչ է, քան կոռուպցիոն ռիսկ, որին Սինանյանը չի խորշում գնալ: «Նախագծի փաթեթը չի պարունակում հիմնավորումներ, թե պատվիրատուն ինչպես է ապահովելու պայմանագրի, կանխավճարի և որակավորման ապահովման պայմանները չկիրառելու դեպքում առաջանալիք հնարավոր ռիսկերի նվազեցումը, ընդ որում, երբ նախագծով նախատեսվում է բացառություն սահմանել նաև հատկացվելիք կանխավճարի չափը սահմանափակող նորմի պահանջների նկատմամբ»,- ի պատասխան բյուջեից 308,904.9 հազար դրամ ուզող Զարեհ Սինանյանի ղեկավարած կառույցի՝ հայտնում են Ֆինանսների նախարարությունից։ 

Բայց դա կառավարությանը չի կանգնեցնել և այն բացել է քսակը Սինանյանի առջև: Հայաստան-Սփյուռք հարաբերությունների վրա վերջինիս կազմակերպած ճամբարները, համաժողովները որևէ ազդեցություն, համենայնդեպս՝ դրական չեն թողնում, փոխարենը՝ Սինանյանը որոշել է իր լուման ներդնել Հայաստանում գնումների ոլորտում կոռուպցիոն գործոնի աճն ապահովելու գործում...