ԵՄ երկրները հունվար-հունիսին Ադրբեջանից գազի գնումների վրա ծախսել են 4,9 մլրդ եվրո

Եվրահանձնաժողովի եռամսյակային զեկույցի համաձայն՝ 2022 թվականի II եռամսյակում ԵՄ երկրների ծախսերը՝ Ադրբեջանից Տրանսադրիատիկ գազատարով (TAP) մատակարարվող գազի գնման համար կազմել են 2,8 միլիարդ եվրո։ Առաջին եռամսյակում ԵՄ երկրներն այդ նպատակների համար ծախսել են 2,1 մլրդ եվրո, իսկ գնումների աճը կազմել է 33,3%։

Ընդհանուր առմամբ, 2022 թվականի առաջին կիսամյակում ԵՄ երկրներն Ադրբեջանից գազ են գնել 4,9 միլիարդ եվրոյով։

Իտալիայի և Հունաստանի համար ադրբեջանական գազի գինը 2022 թվականի ապրիլ-մայիսին կազմել է 98,19 եվրո մեկ ՄՎտ/ժ-ի համար, Բուլղարիայի համար՝ 86,32 եվրո մեկ ՄՎտ/ժ-ի համար։

ԵՀ-ն նշել է Ադրբեջանից մատակարարումների աճ եռամսյակի և տարվա կտրվածքով՝ մոտավորապես 28 ՏՎտժ 2022 թվականի II եռամսյակում՝ նախորդ տարվա նույն ժամանակահատվածի 18 ՏՎտժ-ի դիմաց (տարեկան աճը 57%-ով) և 24 ՏՎտժ՝ 2022 թվականի 1-ին եռամսյակում (II եռամսյակում աճը 16,7% I եռամսյակի համեմատ):

Երկրորդ եռամսյակում TAP-ով ԵՄ մատակարարվող գազի մասնաբաժինը կազմել է ընդհանուր մատակարարումների 2,9%-ը՝ առաջին եռամսյակի 2,5%-ի դիմաց։ «TAP-ը Հարավային գազային միջանցքով մուտք է ապահովում դեպի ադրբեջանական գազային ռեսուրսներ, ինչը ԵՄ-ի գազամատակարարման անվտանգության քաղաքականության կարևոր արդյունքն է», - նշել են ԵՀ-ում։

Ընդհանուր առմամբ, 2022 թվականի երկրորդ եռամսյակում ԵՄ-ն գազի ներկրման վրա ծախսել է մոտ 75 միլիարդ եվրո։

2020 թվականի դեկտեմբերի 31-ին Ադրբեջանը սկսել է գազ մատակարարել Եվրոպա (Իտալիա, Հունաստան և Բուլղարիա) TAP-ի միջոցով։ 2021 թվականին Ադրբեջանը Եվրոպա է արտահանել 8,2 միլիարդ խորանարդ մետր գազ։ 2022 թվականին Ադրբեջանից Եվրոպա գազի արտահանումը կանխատեսվում է 11,5 միլիարդ խորանարդ մետր, մինչև 2027 թվականը այն կաճի մինչև 20 միլիարդ խորանարդ մետր: