Իրանն օգտագործում է իր բոլոր հնարավորություններն ու ներուժը՝ Ուկրաինայում պատերազմին վերջ դնելու համար․ Ռայիսի

Իրանն օգտագործում է իր բոլոր հնարավորություններն ու ներուժը՝ Ուկրաինայում պատերազմին վերջ դնելու համար։ Այս մասին ԻԻՀ նախագահ Էբրահիմ Ռայիսին հայտարարել է իր լեհ գործընկեր Անջեյ Դուդայի հետ զրույցում, փոխանցում է Mehr-ը։

Նախագահի տեղակալ Մոհամմադ Ջամշիդին չորեքշաբթի Twitter-ի իր գրառման մեջ գրել է. «Մինչ Եվրոպան աջակցություն է ցուցաբերում Իրանում անկարգություններին, այսօր Լեհաստանի նախագահ պարոն Դուդան զանգահարել է նախագահին՝ քննարկելու երկկողմ հարաբերությունների ամրապնդումը եւ Եվրոպայում պատերազմի դադարեցումը»: Նրա խոսքով՝ Ռայիսին «Դուդային հավաստիացրել է, որ Իրանի Իսլամական Հանրապետությունն օգտագործում է իր բոլոր հնարավորություններն ու ներուժը՝ պատերազմին վերջ դնելու համար»։

Ռաիսին հերքել է Իրանի դեմ արեւմտյան երկրների կողմից ուկրաինական հակամարտության հետ կապված մեղադրանքները՝ ընդգծելով, որ «Իրանի դիրքորոշումն այն է, որ դիմակայի պատերազմին եւ հակամարտություններին՝ Եվրոպայում պատերազմի սկզբից»։ Նա հայտնել է, որ Իրանը պատրաստ է օգտագործել իր բոլոր միջոցները, որ դերակատարություն ունենա Եվրոպայում պատերազմը դիվանագիտական ճանապարհով դադարեցնելու գործում։

«Ներկա պայմաններում եւ՛ Թեհրանը, եւ՛ Վարշավան պետք է ձգտեն բարելավել տնտեսական եւ առեւտրային հարաբերությունների մակարդակը՝ համապատասխան լուծումներ տալով»,- ասել է Ռայիսին։

Լեհաստանի նախագահն իր հերթին հիշեցրել է Երկրորդ համաշխարհային պատերազմի ժամանակ լեհ ներգաղթյալների նկատմամբ Իրանի հյուրընկալությունը եւ շնորհակալություն հայտնել Իրանին դրա համար։

Անջեյ Դուդան նշել է, որ Իրանի Իսլամական Հանրապետությունը միշտ ձգտել է ընդլայնել եւ ամրապնդել խաղաղությունն ու կայունությունը աշխարհում եւ կոչ է արել բարձրացնել երկու երկրների միջեւ համագործակցության մակարդակը ինչպես երկկողմ, այնպես էլ միջազգային ասպարեզում: