Սամվել Կարապետյանը՝ թիրախում. կգնա՞ Փաշինյանը ռուսական կապիտալի «ռեյդերական» զավթման

Հայաստանում հակառուսական տրամադրությունների ֆոնին լուրեր են տարածվում, թե Արեւմուտքը փորձում է Ռուսաստանին դուրս մղել Հայաստանից, եւ դա դրսեւորվում է ոչ միայն ռուսական ռազմաբազայի դուրսբերման եւ ՀԱՊԿ-ն լքելու ակնարկների տեսքով: Հայտնի է, որ Հայաստանն ու ՌԴ-ն միմյանց հետ կապված են ոչ միայն ռազմավարական դաշնակցային կապերով, այլեւ՝ տնտեսական։ Ռուսական ընկերություններն են շահագործում Մեծամորի ատոմակայանը, Հայաստանի երկաթուղին, գազամատակարարումն իրականացնում է ռուսական «Գազպրոմ» ընկերությունը, դիզվառելիքը հիմնականում ներկրում է «Ռոսնեֆտ»-ը, իսկ Հայաստանի էլեկտրական ցանցերն ու բարձրավոլտ էլեկտրական ցանցերը պատկանում են ռուսաստանաբնակ գործարար Սամվել Կարապետյանին։

Եվ այս ֆոնին, բավական ուշագրավ պրոցեսներ են զարգանում, որոնք միտված են էներգետիկ դաշտի ազատականացման անվան տակ՝ դուրս մղել ռուսական կապիտալը ՀՀ էներգետիկ դաշտից: Շաբաթներ առաջ Հայաստանի ԱԳՆ պատվիրակությունը գտնվում էր ԱՄՆ-ում, որտեղ ստորագրվել են մի շարք կարևորագույն փաստաթղթեր և ձեռք են բերվել համաձայնություններ: Հանդիպումների արդյունքում տարածած հաղորդագրությունից պարզ է դառնում, որ Վաշինգտոնում ստորագրված հայ-ամերիկյան փաստաթղթերը կնպաստեն Հայաստանի էներգետիկ անվտանգությանն ու անկախությանը: ԱՄՆ Պետքարտուղարության մամլո խոսնակ Նեդ Փրայսն էլ, մայիսի 3-ին լրագրողների հետ հարցուպատասխանի ժամանակ անդրադառնալով հուշագրին, հայտարարեց, թե Հայաստանը ցանկանում է դիվերսիֆիկացնել իր էներգետիկ մատակարարումները։ Խոսք գնաց անգամ այն մասին, որ Երևանը քննարկում է հայկական նոր ԱԷԿ-ի կառուցման գործում ամերիկյան մասնակցության հարցը։ Դրանից ամիսներ առաջ պարզ էր դարձել, որ Հայաստանը հրաժարվում է ԱԷԿ 2-րդ էներգաբլոկի համար նախատեսված ռուսական վարկից: Իսկ ՄԱԳԱՏԷ-ի նախագահի այցից հետո քննարկվում էր հնարավորությունը, որ  ստորագրված հայ-ամերիկյան միջուկային ոլորտի համագործակցության հուշագրի հիման վրա Երևանն ընտրի ամերիկյան մոդուլային փոքր կայանների տարբերակը:

ԱՄՆ կատարած այցից հետո պարզ դարձավ ևս մեկ իրողություն, որ բրիտանական Shell -ը ամիսներ անց մուտք կգործի հայկական շուկա:  Այս համատեքստում պետք է ընդգծել այն հանգամանքը, որ Արևմուտքի խոշորագույն նավթագազային ընկերություններից մեկը՝ «Շելը» միացել է Ռուսաստանի դեմ պատժամիջոցներին՝ Ուկրաինայի տարածք ռուսական զորքերի ներխուժման պատճառով:  Հետևաբար սա ոչ միայն կոմերցիոն հարց է, այլ առաջին հերթին աշխարհաքաղաքական, քանի որ սրանով Հայաստանի իշխանությունները բավականին լուրջ հարված են հասցնելու Ռոսնեֆտին, որը հանդիսանում  է ՀՀ հիմնական մատակարարը այս պահին: Մրցակցության պաշտպանության հանձնաժողովն արձանագրել էր, որ Հայաստան ներմուծվող բենզինի և դիզելային վառելիքի գերակշիռ մասը հայաստանյան ներմուծողները ձեռք են բերում «Ռոսնեֆտ-Արմենիա» ՓԲԸ-ից, որը հանդիսանում է Ռուսաստանի նավթաարդյունաբերության առաջատար «ՆԿ «Ռոսնեֆտ» ՀԲԸ դուստր ձեռնարկությունը: Այլ կերպ ասած՝ «Ռոսնեֆտ-Արմենիա»-ն միջնորդ կազմակերպություն է հայաստանյան ներմուծողների և ռուսական «ՆԿ «Ռոսնեֆտ»-ի միջև: 

Վերջերս մամուլում հայտնվել է մի տեղեկություն, որը իշխանությունները սովորականի համաձայն չեն շտապում հերքել: Այդ տեղեկության համաձայն Նենսի Փելոսիի Հայաստան կատարած այցի ընթացքում պատվիրակներից Ֆրենկ Փալոնը գաղտնի հանդիպում է ունեցել Տիգրան Ավինյանի հետ։ Այս հանդիպման ժամանակ Ավինյանին հանձնարարվել է ցանկացած միջոցներով «նեղել» «Գազպրոմ Արմենիայի» և «Հայաստանի էլեկտրական ցանցեր» ձեռնարկության ներկայիս սեփականատերերին՝ ընդգծելով, որ այս ընկերությունների ձեռքբերման համար ԱՄՆ կառավարությունը պատրաստ է ցանկացած միջոցներ հատկացնել։ Վերոնշյալ ձեռնարկությունների սեփականատերերն են համապատասխանաբար «Գազպրոմ»-ը և Սամվել Կարապետյանը։ Այս տեղեկությունները չհերքվեցին, փոխարենը պարզ դարձավ, որ կառավարությունը հանկարծ որոշել է աուդիտ իրականացնել ՀԷՑ-ում: Բացի այդ, ՀԷՑ-ը հայտնվել է նաև ՊԵԿ-ի թիրախում, այստեղ մանրակրկիտ հարկային ուսումնասիրություններ են սկսվել: Լուրեր են տարածվում, որ հաջորդիվ նմանատիպ ուսումնասիրություններ և աուդիտ իրականացվելու է «Գազպրոմ»-ում: 

Արդյո՞ք Փաշինյանը, ստանալով Արևմուտքի քարտ-բլանշը, ռուսական կապիտալի ռեյդերական զավթմանն է նախապատրաստվում, որի արդյունքում դիցուք՝ Սամվել Ալեքսանյանից կխլվի ՀԷՑ-ը ազգայնացման և արևմտյան արդյունավետ մենեջմենթ իրականացնող ընկերությանը հանձնելու պատրվակով: Ամեն դեպքում, նման սցենարի հավանականությունը մեծ է, իսկ առաջին ծիծեռնակներն՝ արդեն իսկ առկա: