Ղրղզստանի վարչապետը կարևորեց ԵԱՏՄ տարածքում փոխադարձ առևտրի ընթացակարգերի պարզեցումը

ԵԱՏՄ անդամ պետությունների քաղաքացիների կյանքի որակը բարելավելու նպատակով պետք է պարզեցվեն փոխադարձ առևտրի ընթացակարգերը։ Ինչպես տեղեկացնում է «Արմենպրես»-ը, Երևանում տեղի ունեցած Եվրասիական միջկառավարական խորհրդի նիստի նեղ կազմով հանդիպմանն այս մասին ասաց Եվրասիական տնտեսական միությունում նախագահող, Ղրղզստանի վարչապետ Ակիլբեկ Ժապարովը։

«Միությունը պետք է ցույց տա քաղաքացիների կյանքի որակի բարելավման իր գլխավոր նպատակը`պարզեցնի փոխադարձ առևտրի ընթացակարգերը։ Դրա համար անհրաժեշտ ամեն ինչ կա, ընդ որում ՝ գլխավորը մեր պետությունների ղեկավարների կամքն է։ Մեզ մնում է անել այն ամենը, ինչ մեզանից կախված է իրական փոխշահավետ գործընկերության համար։ Բոլորս հավատարիմ ենք մեկ նպատակի, այն է՝ ամրապնդել Միությունը ԵԱՏՄ-ի չորս հիմնական սկզբունքների խթանման միջոցով։ Կարևորը այն է, որ մենք՝ որպես եղբայրական պետություններ, որոնք գտնվում են միասնական տնտեսական տարածքում, գտնենք կոնսենսուս օրակարգի բոլոր հարցերի շուրջ»,- ընդգծեց Ժապարովը։