Մութ ամպեր՝ Վահան Քերոբյանի գլխին. ի՞նչ նոր բացահայտումներ են սպասվում

Ամիսներ առաջ հայտնի դարձավ, որ էկոնոմիկայի նախարարությունը հայտնվել է Վերահսկիչ պալատի ուշադրության կենտրոնում: Կառույցի կողմից, մասնավորապես, ուսումնասիրվել է կորոնավիրուսի տնտեսական հետևանքների չեզոքացման հետևանքով տրամադրված վարկերի տոկոսադրույքների սուբսիդավորման ծրագրի շրջանակներում ներկայացված հաշվետվությունը: Ըստ այդմ, հաշվետվության մեջ առկա է եղել խեղաթյուրում՝ 1.249.486 հազար դրամի չափով: Իսկ, օրինակ, էկոնոմիկայի ոլորտում պետական քաղաքականության մշակման, ծրագրերի համակարգման եւ մոնիթորինգի ոլորտում առկա է խեղաթյուրում՝ կապված նախարարության կողմից տրված պարգեւավճարների, ինչպես նաեւ հսկողության գործընթացի թերացում՝ կապված թափուր հաստիքների հետ, մասնավորապես՝ քաղաքացիական ծառայության պաշտոնը թափուր մնալուց հետո՝ երեք ամսվա ընթացքում, պետք է հայտարարվեր մրցույթ, ինչը չի իրականացվել: Այլ անհամապատասխանություններ եւս եղել են, որոնց մասին մանրամասն ներկայացված է 57 էջից բաղկացած եզրակացության մեջ:

Օրեր առաջ էլ պարզ դարձավ, որ պալատը ևս մեկ անհամապատասխանություն է գտել Քերոբյանի ղեկավարած կառույցում:  Դիցուք՝  էկոնոմիկայի նախարարությունը խաղողի, ժամանակակից տեխնոլոգիաներով մշակվող ինտենսիվ պտղատու այգիների եւ հատապտղանոցների հիմնման համար պետական աջակցության ծրագրով սուբսիդավորումը պետք է իրականացներ այնպիսի չափաքանակով, որ վարկերը շահառուներին տրամադրվեին 2 տոկոս տոկոսադրույքով, իսկ սահմանամերձ համայնքների տնտեսավարողներին եւ կոոպերատիվներին՝ 0%, սակայն թվով 110 վարկերից 3-ի սուբսիդավորումն իրականացվել է այնպիսի չափաքանակով, որ վարկերը շահառուներին տրամադրվել են 5 տոկոս տոկոսադրույքով՝ նախատեսված 2 տոկոսի փոխարեն։ Ներքին աուդիտի իրականացման ստորաբաժանում նախարարության կառուցվածքում չի ստեղծվել, իսկ «Ներքին աուդիտի մասին» ՀՀ օրենքի 5-րդ հոդվածի 2-րդ կետով նախատեսված՝ ներքին աուդիտը իրականացնելու համար հրավիրված անձանց գնման ընթացակարգեր չի կազմակերպվել։

Իսկ այժմ գնումների մասին, որոնք նույնպես կարող են հետաքրքրել պատկան կառույցներին: Այս տարվա ընթացքում էկոնոմիկայի նախարարությունը բավականին մեծ գումարների գնումներ է կատարել մեկ անձից: Դիցուք՝ 7,999,950 դրամ է հատկացվել Սահակյան Հրանտ ԱՁ-ին՝ լուսանկարների արտադրության ծառայություններ ձեռք բերելու նպատակով: 

8,000,000 դրամ է հատկացվել Ամատունյան Վահան Արշավիր Ա/Ձ-ին տեսահոլովակների ստեղծման նպատակով

690,000 դրամ է  նախարարությունը փոխանցել «ԱՌՆԱՏԱՐ ՍՊԸ»-ին՝ ներքին շերտավարագույրներ գնելու նպատակով: 

720,000 դրամով Հասմիկ Գասպարյանից նախարարությունը վարձակալության ծառայություններ է ձեռք բերել:

Այս գնումները ընդամենը մի փոքր մասն են մեկ անձից կատարված այն գնումների, որոնք իրականացվել են էկոնոմիկայի նախարարության կողմից: Հաշվի առնելով, որ վերահսկիչ պալատը կարճ ժամանակահատվածում արդեն երկրորդ չարաշահումն է վեր հանում սույն կառույցում, արդյո՞ք չարժի, որպեսզի իրենցից բացահայտ կոռուպցիոն ռիսկ ներկայացնող մեկ անձից կատարված գնումները ևս հայտնվեն պատկան մարմինների ուշադրության կենտրոնում...