Բայդենը հույս է հայտնել, որ Իտալիայի նոր վարչապետ Մելոնին կշարունակի աջակցել Ուկրաինային

ԱՄՆ նախագահ Ջոն Բայդենը հույս է հայտնել, որ Իտալիայի նոր վարչապետ Ջորջիա Մելոնին կշարունակի Ուկրաինային աջակցելու կուրսը։ Այս մասին ասված է ամերիկացի առաջնորդի պաշտոնական շնորհավորական նամակում, որը հրապարակված է Սպիտակ տան կայքում։

«Շնորհավորում եմ Ջորջիա Մելոնիին Իտալիայի վարչապետի պաշտոնը ստանձնելու կապակցությամբ»,- ասված է հեռագրում։

Բայդենը Իտալիան անվանել է ԱՄՆ-ի կենսական դաշնակիցը և մերձավոր գործընկերը՝ նշելով, որ երկու երկրները «միասին լուծում են ընդհանուր գլոբալ խնդիրներ»։

«Որպես G-7-ի առաջնորդներ՝ ես ակնկալում եմ շարունակական աջակցություն Ուկրաինային՝ Ռուսաստանին պատասխանատվության ենթարկելով իր ագրեսիայի համար, ապահովելով մարդու իրավունքների և ժողովրդավարական արժեքների հարգումը և կայուն տնտեսական աճը», - գրել է Բայդենը Մելոնիին ուղղված հեռագրում:

Հոկտեմբերի 22-ին «Իտալիայի եղբայրներ»  կուսակցության նախագահ Ջորջ Մելոնին երդվել է որպես Իտալիայի նոր վարչապետ։

Ջորջիա Մելոնին 44 օրյա պատերազմից հետո ՅՈՒՆԵՍԿՕ-ին առաջարկել էր առաքելություն ուղարկել Լեռնային Ղարաբաղ՝ պաշտպանելու հայկական հազարամյա մշակութային ու կրոնական ժառանգությունը: Նշենք, որ 2018 թվականին Ջորջիա Մելոնին հայկական խաչ է նվեր ստացել. «Սա շատ գեղեցիկ նվեր է, որը հիշեցնում է հայ ժողովրդի ինքնությունն ու ավանդույթները, որն իր արմատներն ունի աստվածաշնչյան և քրիստոնեական ավանդույթներից»- գրել էր Մելոնին։ 2019 թվականին Ջորջիա Մելոնին գրել է. «Ապրիլի 24-ը Հայոց ցեղասպանության հիշատակի օրն է. 1915-1916 թվականներին երիտթուրքերը 1.500.000 մարդ կnտnրեցին: Այս nղբերգությունը ճանաչվել է ՄԱԿ-ի, Եվրոպական Խորհրդարանի և Վատիկանի կողմից, բայց ամոթալի կերպով հերքվում է Էրդողանի կողմից: Նաև այս պատճառով է Իտալիայի Եղբայրներ կուսակցությունը «ոչ» է ասում Թուրքիային Եվրոպայում»: