Նիկոլ Փաշինյանի հերթական «ականը» Մոսկվայի համար

Արդարադատության նախարարությունն առաջարկում է պետության ինքնիշխանության խախտման համար քրեական պատիժ նախատեսել։ Նախագիծը շրջանառվել է Իրավական ակտերի նախագծերի հրապարակման e-draft.am կայքում։

Նախագծով առաջարկվում է 12-15 տարվա ժամկետով ազատազրկում նախատեսել՝ «ինքնիշխանությունից հրաժարվելուն` բռնություն գործադրելու կամ բռնություն գործադրելու սպառնալիքի միջոցով հօգուտ այլ պետության կամ միջազգային կամ վերպետական հանրային կազմակերպության Հայաստանի Հանրապետության ինքնիշխանությունը լրիվ կամ մասնակի սահմանափակելուն ուղղված գործողությունների համար»։ Պատժվելու են նաև ինքնիշխանությունից հրաժարվելուն ուղղված հրապարակային կոչեր անողները։

Ընդամենը օրեր առաջ  Փաշինյանի ընտանիքին պատկանող Armtimes.com կայքում («Հայկական ժամանակ» օրաթերթի կայքում) հրապարակվել է «Ինչ է ուզում Ռուսաստանը․ ի գիտություն Վեհափառ հայրապետի, երեք նախագահների և փորձագիտական հանրության» վերնագրով հոդված։ Հղում ունելով «Հավաստի Աղբյուր»-ին՝ կայքը գրում է. «Ռուսաստանն ուզում է, որ Հայաստանը դառնա միութենական պետության կամ Ռուսաստանի մաս»։

Այս երկու տեղեկությունները, բնականաբար, հաջորդել են մեկը մյուսին և հանդիսանում են միմյանց տրամաբանական շարունակությունը: Պարզից էլ պարզ է, որ Նիկոլ Փաշինյանը պատրաստվում է ՌԴ-ին Հայաստանից դուրս մղելու օպերացիայի իրականացման վերջին արարին և այդ առումով օրենքի նախագծի առաջ քաշումը պայմանավորված է՝ Միութենական պետությանը միանալու կոչեր անող քաղաքացիներին լռեցնելուն: Բացի այդ, եթե կնքվի այսպես կոչված` խաղաղության պայմանագիրը, ապա առաջ է գալու ռուսական բազան Հայաստանի տարածքից դուրս բերելու հարցը և այս դեպքում օրենքը կարող է մահակ դառնալ այդ ծրագրի դեմ ընդդիմացող կամ այդ ծրագիրը քննադատող քաղաքացիների և ուժերի դեմ:

Թեև Փաշինյանը փորձում է կտրուկ շրջել արտաքին քաղաքական վեկտորը, մինչ այս պահը նա հանդիպում է Մոսկվայի համառ դիմադրությանը: Թվիթերյան իր էջում վարչապետը Ադրբեջանի նախագահին առաջարկել էր հաջորդ հանդիպումը կազմակերպել Բրյուսելում: Դրան հաջորդեց լռություն, իսկ այժմ արդեն ռուսական առաջատար պարբերականները գրում են, որ Փաշինյան-Ալիև հանդիպումը կայանալու է Ռուսաստանում՝ իհարկե Վլադիմիր Պուտինի մասնակցությամբ: Մյուս կողմից այդ նույն առաջատար պարբերականները Փաշինյանին քողարկված մեսիջ են հղում` գրելով, որ դիցուք՝ վարչապետի այս քաղաքականության արդյունքում հանրության համբերությունը կարող է  հատել: Ի՞նչ է սա նշանակում: Արդյո՞ք սա մեսիջ է ՀՀ իշխանություններին, որ Արևմուտքին հաճոյալանալու և Մոսկվային տարածաշրջանից դուրս մղելու քայլերը  շարունակելու դեպքում Մոսկվան կանաչ լույս կվառի օրինակ՝ հայկական ընդդիմության առաջ, այսինքն` վտանգի կենթարկվի իր՝ Նիկոլ Փաշինյանի իշխանությունը:

Ինչպես երևում է՝ տարածաշրջանում բավականին լուրջ պրոցեսներ են հասունանում, և ՀՀ իշխանությունների անհեռանկար քաղաքականության արդյունքում Հայաստանը կրկին հայտնվելու է դրանց կիզակետում՝ դրանից բխող բոլոր անվտանգային ռիսկերով...