ԱՄՆ-ում թոռը տատիկից գողացել է 13 հազար դոլար և բաժանել դասընկերներին
ԱյլԱՄՆ-ում թոռը տատիկից գումար է գողացել ու բաժանել դասընկերներին, գրում է Complex-ը։ Հաղորդվում է, որ այս կերպ թոշակառուն կորցրել է ավելի քան 13.000 դոլար։
Տեղական լրատվամիջոցների փոխանցմամբ՝ դեպքը տեղի է ունեցել Սամերֆիլդի Լեյք Ուեյր ավագ դպրոցում։ Այնտեղից ոստիկանությունը հաղորդագրություն է ստացել, որ աշակերտը գումար է բաժանում համադասարանցիներին։ Դպրոցի աշխատակիցները խուզարկել են երեխայի ուսապարկը և հայտնաբերել 2500 դոլար կանխիկ գումար:
Նա խոստովանել է, որ ներխուժել է տատիկի չհրկիզվող պահարան ու հափշտակել մոտ 13.000 դոլար։ Ոստիկանության աշխատանքի շնորհիվ վերադարձվել է 700 դոլար։ Դպրոցի տնօրենը դիմել է աշակերտների ծնողներին՝ հորդորելով վերադարձնել այն գումարը, որը իրենց երեխաները ստացել են դեռահասից։
«Գումարը հանձնելու դեպքում որևէ հետևանք չի լինի»,- հավելել է տղամարդը։
Միջադեպը ներկայումս հետաքննվում է։ Ըստ ոստիկանների՝ դեռահասին սպառնում է մեղադրանք՝ խոշոր չափի գողության համար։