Քանյե Ուեսթը դադարել է միլիարդատեր լինել սոցիալական ցանցերում հրապարակումների պատճառով. Forbes

Ամերիկացի երգիչ Քանյե Ուեսթը դադարել է միլիարդատեր լինել այն բանից հետո, երբ մի քանի ընկերություններ դադարեցրել են նրա հետ համագործակցությունը սոցիալական ցանցերում վիճահարույց գործողությունների և հրապարակումների պատճառով։ Այս մասին երեքշաբթի հայտնել է Forbes ամսագիրը։

Ըստ հրատարակության՝ Ուեսթի կարողությունն այժմ հասնում է 400 միլիոն դոլարի՝ համեմատած այս տարվա գարնանը 2 միլիարդ դոլարի հետ: Սևամորթ երգչի կարողությանը հիմնականում վնաս է հասցրել գերմանական Adidas արտադրողի հետ պայմանագրի խզումը (1,5 միլիարդ դոլար), որը վերջին տասնամյակում Yeezy հագուստի շարքը վերածել էր ապրանքանիշի։ Այս ապրանքանիշին, ըստ մասնագետների, բաժին է ընկնում Adidas-ի ընդհանուր վաճառքի մինչև 8%-ը

Անցյալ շաբաթ ֆրանսիական Kering խումբը, որին պատկանում են Gucci, Balenciaga և Yves Saint Laurent շքեղ ապրանքանիշերը, հայտարարեց, որ Balenciaga-ն դադարեցնում է իր համագործակցությունը Ուեսթի հետ:

Հոկտեմբերի 3-ին Փարիզի Նորաձևության շաբաթվա շրջանակներում Քանյե Ուեսթը ներկայացել է սպիտակ շապիկով՝ «White Lives Matter» գրությամբ։ Այս կարգախոսը ստեղծվել է ի հեճուկս «Black Lives Matter» շարժման: Քննադատություններին երգիչը պատասխանել է՝ սոցցանցերում վիրավորական հայտարարություններ հրապարակելով նորաձևության խմբագիրների և նախկին ընկերների մասին։ Շուտով նրա Instagram-ի և Twitter-ի էջերը արգելափակվել են ատելության խոսքի ոլորտում սոցիալական մեդիայի քաղաքականության խախտման պատճառով։