Իսրայելի նախագահը ԱՄՆ-ին ապացույցներ կներկայացնի այն մասին, որ իրանական անօդաչուներն «օգտագործվում են» Ուկրաինայում

Իսրայելի նախագահ Իսահակ Հերցոգը վաղը կայանալիք հանդիպման ժամանակ ԱՄՆ պաշտոնյաներին ապացույցներ կներկայացնի այն մասին, որ իրանական անօդաչու թռչող սարքերն օգտագործվում են Ուկրաինայի պատերազմում, հայտնում է Times of Israel-ը։

Վերջին մի քանի շաբաթների ընթացքում «իրանական առաջադեմ անօդաչուները գործել են Ուկրաինայում խաղաղ բնակչության դեմ», հայտնել է նախագահի գրասենյակը: Տեսողական վերլուծության միջոցով ուժայինները պարզել են, որ անօդաչու թռչող սարքերի բեկորները «նույնական են նրանց հետ, որոնք Իրանում են մշակվել»։

Հերցոգն այդ «հանցանշանների» լուսանկարները Վաշինգտոն կատարելիք իր երկօրյա այցի ընթացքում կներկայացնի ԱՄՆ պաշտոնյաներին։

Լուսանկարներում երեւում է իրանական Shahed-136 մոդելի անօդաչուի արձակումը 2021 թվականի դեկտեմբերին Իրանում վարժանքների ժամանակ։ Այլ պատկերներում երեւում է, որ նույն դրոնն իբր ընկել է Ուկրաինայում։

«Ֆոտոապացույցները ցույց են տալիս, որ Ուկրաինայում անօդաչու սարքերը շատ ընդհանուր բաներ ունեն՝ ներառյալ դրանց կառուցվածքը, չափերը եւ համարակալումը»:

«Իրանը եւս մեկ անգամ ապացուցում է, որ իրեն չի կարելի վստահել, եւ որ յուրաքանչյուր տարածաշրջանում, որտեղ կան սպանություններ, տառապանքներ եւ ատելություն, կա Իրան»,- ասվում է Հերցոգի հայտարարության մեջ: «Իրանական զենքը կենտրոնական դեր է խաղում գլոբալ ապակայունացման գործում, եւ միջազգային հանրությունը պետք է յուրացնի այս դասը այժմ եւ ապագայում»,- հավելել է նա: