Կադիրովն Ուկրաինան անվանել է «ռուսական տարածք», իսկ հատուկ ռազմական գործողությունը՝ «մեծ ջիհադ»

Չեչնիայի Հանրապետության ղեկավար Ռամզան Կադիրովն իր Telegram ալիքում Ուկրաինայում ռազմական գործողություններն անվանել է «մեծ ջիհադ», իսկ երկիրը՝ «ռուսական տարածք»։

Իր հրապարակման մեջ պաշտոնյան խոսում է հայրենասիրության մասին և ասում, որ չի հասկանում նրանց, ովքեր «Հայրենիքը միայն խոսքով են սիրում» և նրանց, ովքեր չեն տեսնում Ռուսաստանին վնասելու փորձերը։ Կից տեսաուղերձում նա հորդորում է մոբիլիզացվածներին «չարտասվել» տեխնիկայի բացակայության պատճառով, այլ Ուկրաինայի զինված ուժերից «խլել» զենքը, տեխնիկան և համազգեստը։

«Ես ձեզ խոսք եմ տալիս՝ մենք ամեն օր հարձակվելու ենք նրանց վրա։ <...> Մենք նրանց կվառենք։ Մենք ոչ մի տեղ կանգ չենք առնի: Մեր տարածքը Զապորոժիեն չէ, Խերսոնը չէ։ Մեր տարածքն է Օդեսան, Կիևը, Խարկովը։ Բոլոր շրջանները և ընդհանուր առմամբ Ուկրաինան մեր տարածքն է՝ ռուսական», - ասում է Կադիրովը տեսանյութում։

Նա նաև մեղադրում է ուկրաինական կողմին ռուսական տարածքների և քաղաքացիական օբյեկտների գնդակոծման մեջ։

«Սա մեծ ջիհադ է, որին մենք բոլորս պետք է մասնակցենք։ Եվ մենք կանգ չենք առնելու, մենք նրանց կսպանենք»,- ասում է Չեչնիայի ղեկավարը։

Միաժամանակ, ձայնագրության վերջում նա խոստանում է, որ շուտով «լավ նորություններ» կլինեն։