Ոսկեվազ գյուղում Opel-ը բախվել է խոտանված Volkswagen-ին և գլխիվայր շրջվել․ 32-ամյա ուղևորը, ում ծննդյան օրն էր, տեղում մահացել է

Երեկ՝ հոկտեմբերի 25-ին, ողբերգական ավտովթար է տեղի ունեցել Արագածոտնի մարզում։ Ժամը 19։30-ի սահմաններում Ոսկեվազ-Ոսկեհատ ավտոճանապարհին Ոսկեվազ գյուղի վարչական տարածքում Արագածոտնի մարզի բնակիչ 32-ամյա Աշոտ Մեժլումյանը իր վարած Opel մակնիշի ավտոմեքենայով դուրս է եկել հանդիպակաց երթևեկելի գոտի, բախվել ճամփեզրի թույլատրելի հատվածում կայանված, չշահագործվող ու խոտանված Volkswagen մակնիշի ավտոմեքենային և գլխիվայր շրջվել։

Ինչպես դեպքի վայրից հայտնում է Shamshyan.com-ը, վթարի հետևանքով Ա․ Մեժլումյանը մարմնական վնասվածքներով տեղափոխվել է «Աշտարակ» բժշկական կենտրոն, իսկ ուղևոր՝ Արագածոտնի մարզի բնակիչ 32-ամյա Մհեր Գյուլնազարյանը տեղում մահացել է։ 

Օպերատիվորեն ժամանել են Արտակարգ իրավիճակների նախարարության Փրկարար ծառայության Աշտարակի թիվ 19 հրշեջ-փրկարարական ջոկատից 1 մարտական հաշվարկ։ 

Հրշեջ-փրկարարները  հոսանքազրկել են ավտոմեքենան, սահմանազատել տարածքը։

 Վթարի փաստով Արագածոտնի մարզային քննչական վարչությունում նախաձեռնվել է քրեական վարույթ։ Քննիչի հանձնարարականով՝ ավտոմեքենան տեղափոխվել է ոստիկանության Աշտարակի բաժնի պահպանվող հատուկ տարածք։  Աղբյուրի տեղեկություններով՝ երեկ՝ մահացած Մ․ Գյուլնազարյանի ծննդյան օրն էր։