Հայկ Գրիգորյանը դատախազությունից դիմումը հետ է վերցրել մրցույթից մեկ օր առաջ

ՔԿ նախկին նախագահ Հայկ Գրիգորյանը, որը ՀՀ զինվորական դատախազի պաշտոնում միակ թեկնածուն էր, մրցույթից ընդամենը մեկ օր առաջ է դիմումը հետ վերցրել։ Այս մասին տեղեկանում ենք դատախազությունից։

Հիշեցնենք, որ դեռեւս 2022թ սեպտեմբերի 20-ին դատախազությունը մրցույթ է հայտարարել՝ զինդատախազի պաշտոնի համար, իսկ հայտարարությունը տեղադրվել է դատախազության պաշտոնական կայքում: Մրցույթին մասնակցելու համար դիմումների ընդունման վերջնաժամկետ էր սահմանվել 2022թ.-ի սեպտեմբերի 27-ը: Գլխավոր դատախազությունը մեկ դիմում էր ստացել, այն էլ՝ Հայկ Գրիգորյանից։
Այլ խոսքով՝ ՀՀ զինվորական դատախազի պաշտոնը հետաքրքրել է միայն ՔԿ նախկին նախագահ Հայկ Գրիգորյանին, սակայն, ինչպես պարզվեց հետագայում՝ Հայկ Գրիգորյանը եւս հրաժարվել է այդ գաղափարից։ «Փաստինֆո»-ի ունեցած տեղեկություններով՝ Կոռուպցիայի կանխարգելման հանձնաժողովն արդեն իսկ ուսումնասիրել էր Հայկ Գրիգորյանի բարեվարքությունը և եզրակացություն ներկայացրել, սակայն եզրակացությունից հետո Գրիգորյանը դատախազությունից հետ է վերցրել դիմումը։

Ի դեպ, մամուլում շրջանառվող լուրերի համաձայն, Հայկ Գրիգորյանը քաղաքական իշխանություններից նոր առաջարկ է ստացել եւ որոշել է գնալ Բարձրագույն դատական խորհուրդ՝ որպես ԲԴԽ գիտնական- անդամ, որի հաստիքը թափուր է մնացել Կարեն Անդրեասյանի՝ ԲԴԽ նախագահ ընտրվելուն հաջորդած Գրիգոր Բեքմեզյանի հրաժարականից հետո։

«Փաստինֆո»-ն կապ է հաստատել նաև ԱԺ «Քաղաքացիական պայմանագիր» խմբակցության պատգամավորի հետ՝ պարզելու, թե արդյոք որոշում կայացվել է՝ Հայկ Գրիգորյանի թեկնածությունն առաջադրելու վերաբերյալ, սակայն պատգամավորը զերծ մնաց մեկնաբանությունից՝ նշելով, որ որոշում կայացնելու պարագայում այդ մասին կհայտարարվի։ «Փաստինֆո»-ն փորձել է կապ հաստատել նաև Հայկ Գրիգորյանի հետ, սակայն նա զանգերին այդպես էլ չի պատասխանել։