«Փաստ». Իշխանությունների «սև» ցուցակը

«Փաստ» օրաթերթը գրում է. «Իշխանությունները նախ «սլիվ» կազմակերպեցին, հետո պաշտոնապես հաստատեցին, որ ՌԴ Պետդումայի պատգամավոր, Պետդումայի ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի այցը Հայաստան համարվել է անցանկալի։ Սրան հետևեց հաջորդ «սլիվը»՝ Մարգարիտա Սիմոնյանի մասով: Զատուլինի դեպքում պաշտոնական մեկնաբանությունն այն է, որ վերջին շրջանի նրա հայտարարությունները «վնասում են մեր պետությունների բարեկամական և դաշնակցային հարաբերությունների զարգացմանը»: Իրականում պատճառը շատ ավելի տրիվիալ է. Զատուլինը տրորել է Հայաստանի գործող իշխանությունների ու մասնավորաբար Նիկոլ Փաշինյանի «ոտքը»:

Այսինքն, ինչպես փորձագետներն են մեզ հետ զրույցում նշում, այս իշխանությունները պետական ինստիտուտները չարաշահում են իրենց սեփական քաղաքական օգուտների, սեփական քաղաքական գիծն իրականացնելու և այդ նույն սեփական քաղաքականությանը սպառնացող ռիսկերը չեզոքացնելու համար: «Փաստ» թերթի ունեցած տեղեկություններով, իշխանությունները բավականին «սոլիդ» ցուցակ ունեն, որտեղ ընդգրկված են Հայաստանի գործող իշխանություններին քննադատության ենթարկող՝ ռուսաստանցի քաղաքական գործիչներ ու լրագրողներ՝ հիմնականում հայամետ դիրքորոշմամբ, որոնց մուտքը Հայաստան անցանկալի է ճանաչվելու:

Իշխանությունները նրանց անունները հրապարակ են նետելու քիչ-քիչ, նախ՝ «սլիվներով», ինչպես Կոնստանտին Զատուլինի ու Մարգարիտա Սիմոնյանի դեպքում»: