Կինը պատմել է՝ ինչպես է հայրը իրեն ստիպել թաքցնել 70 զոհերի դիերը

ԱՄՆ-ում տեղի բնակչուհին իրավապահներին պատմել է իր 70-ամյա հոր մասին, ով, նրա խոսքով, սերիական մարդասպան է եղել։ Այս մասին հայտնում է Newsweek-ը։

Միջադեպը տեղի է ունեցել Այովա նահանգում։ Տղամարդը մահացել է մոտ 10 տարի առաջ, սակայն հարազատներից մեկը որոշել է պատմել նրա հանցագործությունների մասին։ Նրա դստեր խոսքով՝ 30 տարվա ընթացքում ամերիկացին սպանել է 50-70 կնոջ։ Իսկ ինքը օգնել է հորը թաքցնել դիերը։

«Ես գիտեմ, թե որտեղ են թաղված մարմինները։ Նա մեզ միայն ասում էր, որ գնում է ջրհորի մոտ։ Ես արդեն գիտեի, թե դա ինչ է նշանակում»,- հիշում է մարդասպանի դուստրը: Ֆրեմոնտ շրջանի շերիֆը հաստատել է, որ երկու ոստիկանական շներ մատնանշել են ամերիկացու կողմից նշված վայրում քայքայվող մարմինների առկայությունը:

Ոստիկանությունը հետաքննություն է սկսել 2021 թվականին, սակայն չի կարողացել սկսել մարդկային մասունքների որոնումը, քանի որ նրանք պետք է թույլտվություն ստանան հողի ներկայիս սեփականատերերից։

Ըստ հետաքննության նախնական վարկածի՝ տղամարդը գայթակղել է տուժողներին, որոնք նման են եղել միմյանց և հիմնականում զբաղվել են մարմնավաճառությամբ։