Պուտինը Էրդողանին անվանել է հետևողական և վստահելի գործընկեր

Ռուսաստանի նախագահ Վլադիմիր Պուտինը Թուրքիայի նախագահ Ռեջեփ Թայիփ Էրդողանին անվանել է ուժեղ և ամուր առաջնորդ, ով առաջնորդվում է բացառապես իր երկրի շահերով։

«Նա ուժեղ, ամուր առաջնորդ է, ով առաջնորդվում է, առաջին հերթին, և գուցե բացառապես Թուրքիայի, թուրք ժողովրդի և թուրքական տնտեսության շահերով։ Սա մեծապես բացատրում է նրա դիրքորոշումը թե՛ էներգետիկայի հարցում, թե՛ «Թուրքական հոսքի» կառուցման գործում»,- ասել է Պուտինը։

Պուտինի խոսքով՝ Էրդողանը երբեք թույլ չի տալիս նստել իր վզին և առաջնորդվել երրորդ երկրների շահերով, նա հետևողական և վստահելի գործընկեր է, թեկուզ և դժվար:

«Նախագահ Էրդողանը երբեք թույլ չի տալիս նստել իր վզին և առաջնորդվել երրորդ երկրների շահերով: Բայց, իհարկե, մեզ հետ երկխոսության ժամանակ նա առաջին հերթին պաշտպանում է իր շահերը: Այս առումով Թուրքիան ընդհանրապես և նախագահ Էրդողանը՝ մասնավորապես, հեշտ գործընկերներ չեն: Շատ որոշումներ ծնվում են նման երկար և դժվար վեճերի, բանակցությունների մեջ: Բայց երկուստեք ցանկություն կա հասնել այդ պայմանավորվածություններին։ Եվ մենք, որպես կանոն, ձեռք ենք բերում այդ պայմանավորվածությունները։ Այս առումով Էրդողանը, իհարկե, հետեւողական ու վստահելի գործընկեր է»,- ասել է Պուտինը։