Սեուլում հրմշտոցի հետևանքով զոհերի թիվը հասել է 151-ի (տեսանյութ)

Հոկտեմբերի 29-ին Սեուլի կենտրոնում գտնվող Itaewon Walking Street-ում Հելոուինի տոնակատարության ժամանակ հրմշտոց է տեղի ունեցել, որի հետեւանքով զոհվել է 151, վիրավորվել՝ առնվազն 82 մարդ։

Ոստիկանության տվյալներով շաբաթ օրը մոտ 100 հազար մարդ է հավաքվել Իտաեւոն շրջանում, որը լի է բարերով, ռեստորաններով եւ ակումբներով: Հրմշտոցը սկսվել է տեղական ժամանակով 22:20-ի սահմաններում Հեմիլթոն հյուրանոցի մերձակայքում գտնվող նեղ հետիոտնային փողոցներում, որը գտնվում է մետրոյի Itaewon կայարանի մոտ:

Մահացածների թվում կա 97 կին եւ 54 տղամարդ, որոնց մեծ մասը մինչեւ 30 տարեկան։ Առնվազն 19 օտարերկրացիներ, այդ թվում՝ Իրանի, Չինաստանի, Նորվեգիայի եւ Ուզբեկստանի քաղաքացիներ, դարձել են հրմշտոցի զոհ, հաղորդում է Yonhap գործակալությունը։ Հարավային Կորեայում Ռուսաստանի դեսպանատունը հայտնել է միջադեպի հետեւանքով երեք ռուս կնոջ մահվան մասին։

Սեուլի փրկարար ծառայությունների ներկայացուցչի խոսքով՝ տուժել է 15 օտարերկրյա քաղաքացի։ Իշխանությունները մոտ 355 հաղորդում են ստացել անհետ կորածների մասին։ Զոհվածների եւ վիրավորների ճնշող մեծամասնությունը 18-ից 30 տարեկան երիտասարդներ են, որոնց գրեթե երկու երրորդը կանայք են։

Երկրում համազգային սուգ է հայտարարված, որը կտեւի մինչեւ նոյեմբերի 5-ը ներառյալ։