Զարեհ Սինանյանը սփյուռքի «գրպանն» է գցում իր և իր քաղաքական թիմի ձախողումները

Վերլուծական 31 Հոկտեմբեր, 2022 21:00

Զարեհ Սինանյանը սփյուռքի «գրպանն» է գցում իր և իր քաղաքական թիմի ձախողումները

Սփյուռքի գործերի գլխավոր հանձնակատար Զարեհ Սինանյանը, ով վերջերս առաջարկում էր Հայաստանը արաբների հայրենիքի վերածել, իր իսկ կողմից կազմակերպված համաշխարհային հայկական համաժողովի ընթացքում էլ ավելի դարակազմիկ միտք է արտահայտել՝ ոչ ավել ոչ պակաս պատերազմի պարտության մեջ մեղադրելով աշխարհի բոլոր հայերին: Նրա կարծիքով՝ եթե սփյուռքը լուռ է եղել, տեսել է, որ կոռուպցիա է եղել, տեսել են, որ մարդիկ միլիոնով հեռանում են երկրից, կարող կադրերը հեռանում են երկրից, տեսնում են, որ բանակում անասելի պայմաններ են, չի կարող նման բանակը դիմագրավել 21-րդ դարի մարտահրավերին, տեսել ու լռել են, ու եթե այս ամենը տեսնելով՝ գնացել են նկարվել են, հանդիպել, ուրախացել են, հետո վերադարձել են սփյուռք եւ հայհոյել նույն ղեկավարներին, ուրեմն մեղք ունեն։

Թե որքանով սփյուռքի հայկական կառույցները պետք է տեղյակ լինեին բանակում տիրող իրական վիճակին, պետական համակարգում առկա կոռուպցիային՝ իհարկե մեծ հարց է, եթե անգամ Սինանյանի քաղաքական ղեկավար Նիկոլ Փաշինյանն է պնդում, որ մինչև պատերազմը վստահ էր, որ բանակում ոչնչի կարիք չկա, բանակն էլ տարածաշրջանում մշտապես, կրկնում են՝ մշտապես, ամենամարտունակն է եղել: Սակայն, վերադառնանք 44-օրյա պատերազմին և այն օգնությանն ու օժանդակությանը, որը սփյուռքը այդ օրերին ցուցաբերում էր Հայաստանին և Արցախին:

Միլիոնավոր դոլարներ հանգանակվել էին 44-օրյա պատերազմի ընթացքում, երբ մարդիկ վաճառում էին իրենց վերջին ունեցվածքը և այն ուղղում հայոց բանակի կարիքների հոգալուն: Սակայն, ինչպես պարզվում է, կառավարությունը այլ շատ ավելի կարևոր և արդիական նպատակներ և խնդիրներ ուներ լուծելու: Ինչպես հայտնի է՝ 85 մլրդ 858 մլն դրամ է ստացել կառավարությունը: Այս գումարից կառավարության տարբեր օղակներին արդեն հատկացվել է մոտ 70 մլրդ 81 մլն: 15 մլրդ 777 մլն մնացել է չծախսված: Անգամ վարչապետի աշխատակազմն է ձեռքը մտցրել այդ փողերի մեջ: «Հայաստան» հիմնադրամի փոխանցումից 1 մլրդ 485 մլն դրամ վարչապետի աշխատակազմը ստացել է փոստային ծառայությունների արդիականացման համար: Պաշտպանական գերատեսչությանը սեպտեմբերի 30-ից մինչեւ հոկտեմբերի 28-ը ռազմական կարիքների համար մի քանի անգամ հատկացումներ են արվել՝ ստացել է 17 մլրդ 403 մլն, 1 մլրդ 476 մլն, 5 մլրդ եւ 2,3 մլրդ դրամի չափով: Սակայն, ինչպես պարզվում է՝ ՊՆ-ն «Հայաստան» հիմնադրամից գումարներ է ստացել «նախարարության շենքային պայմանների բարելավման», շենքերի եւ շինությունների բարեկարգման համար: Սփյուռքի մեր հայրենակիցները հասցեական հարցեր են նաև ուղղել ՀՀ իշխանություններին, այդ թվում Զարեհ Սինանյանին, հարցեր, որոնք անպատասխան են մնացել: Դիցուք՝ «Ֆիդայիներ» ՀԿ նախագահ Սեյրան Չիլինգարյանը ֆեյսբուքյան իր էջում դժգոհել էր, որ ազատամարտիկների համար Ֆրանսիայից դեղեր են ուղարկել, սակայն մաքսակետում խնդիրներ են ստեղծում։

2020 թվականի հոկտեմբերի 20-ին Զարեհ Սինանյանը հայտարարել էր, որ սփյուռքը այսօ՛ր պետք է օգնի, վաղը ուշ կլինի, օգնելու բան չի լինի: Սփյուռքը օգնեց, անելով ավելին քան կարող էր, օգնեց ոչ միայն նյութապես այլ հազարավոր կամավորներով, ովքեր այդ օրերին ժամանում էին Հայաստան՝ Արցախ մեկնելու և այն պաշտպանելու վճռականությամբ: Սփյուռքը օգնեց, որպեսզի այսօր Զարեհ Սինանյանը իրենց թիմի քաղաքական պատասխանատվությունը փորձի գցել սփյուռքի գրպանը, կարծես սփյուռքն էր Հայաստանը մտցնում աշխարհաքաղաքական փակուղի, կամ սփյուռքն էր բանակցությունները սկսում սեփական կետից և տապալելով դրանք՝ հասցնում պատերազմի: Իսկ գուցե սփյուռքը մեղավոր է այն բանում, որ Սինանյանից և իր թիմակիցներից հետ չի պահանջել՝ ակնհայտ ոչ նպատակային օգտագործված միլիոնավոր դոլարները, որոնք հետագայում գնացել են պարգևավճարների և շենքային պայմանների բարելավմանը:

Զարեհ Սինանյանը, ի դեպ, սրտնեղել է, որ սփյուռքի հայկական կառույցների մեծ մասը հրաժարվել է մասնակցել իր կազմակերպած համաշխարհային հակակական համաժողովին: Միևնույն ժամանակ, նա գտնում է, որ Հայաստանի և սփյուռքի մեջ շարունակում է սեպ խրված մնալ, հետաքրքիր է, իսկ ըստ Սինանյանի՝ ո՞վ կամ ովքե՞ր են մեղավոր այդ խրված սեպի մեջ, թերևս՝ կրկին սփյուռքը, քանի որ ինքը՝ Սինանյանը, և իր թիմը սեփական աչքում գերանը նախընտրում են չտեսնելու տալ...