«Իմ եղբայր Իրանը ինձ վաճառեց Հայաստանին». Ալլահշուքյուր Փաշազադեն սպառնացել է Իրանին

Կովկասի մահմեդականների վարչության նախագահ Շեյխ-ուլ-իսլամ Ալլահշուքյուր Փաշազադեն Real TV-ին տված հարցազրույցում ասել է, որ Իրանը Ադրբեջանը վաճառել է Հայաստանին։

«Որպես Ադրբեջանի կրոնական կենտրոն՝ մենք մեր պարտքն ենք համարում արտահայտել մեր վերաբերմունքը իրողություններին կրոնական և հոգևոր հարթությունում։ Այն, որ Իրանն ու Ադրբեջանը կապող պատմական արժեքներից առանձնահատուկ նշանակություն ունի կրոնական գործոնը, դարերի ընթացքում ձևավորված փաստ է։ Այս իրողությունը պետք է ծառայի ժողովուրդների հետագա մերձեցմանը։ Ընկերը ճանաչվում է փորձանքի մեջ»,- ասվում է նրա հայտարարության մեջ:

«Մահմեդական Իրանի համակողմանի աջակցությունը Հայաստանին, որը օկուպացիոն քաղաքականություն է վարում Ադրբեջանի դեմ, դատապարտվում է մահմեդականների կողմից։ Ի տարբերություն մուսուլմանական այլ երկրների, որոնք համերաշխության դիրքերից խոսելով՝ քաղաքական, դիվանագիտական ​​հարաբերություններ չհաստատեցին ագրեսոր Հայաստանի հետ, դեսպանատներ չբացեցին և օկուպացիան դատապարտող հայտարարություններ արեցին, Իրանն էլ ավելի է խորացրել համագործակցությունը Հայաստանի հետ»,- ասել է Փաշազադեն։

Նա նաև սպառնալիքներ է հնչեցրել Իրանի հասցեին. «Եթե Իրանը, որը սպառնացել է խաղաղ գործընթացին և այս դժվարին ժամանակահատվածում Կապանում հյուպատոսություն է բացում, հայտարարի, որ պատրաստ է բացել Հայաստանի գլխավոր հյուպատոսությունը Ադրբեջանի հնագույն քաղաքում՝ Թավրիզում, դա չի կարող համարվել որպես բարեկամական և եղբայրական քայլ: Սա չի համապատասխանում իսլամական գաղափարախոսությանը, սա մահմեդականի կողմից մահմեդական եղբոր դավաճանություն է»,- ասվում է հայտարարության մեջ՝ չհստակեցնելով, թե ինչ կապ ունի Բաքուն կամ ինքը՝ Փաշազադեն հնագույն Թավրիզ քաղաքի հետ։