Ամեն ինչ չէ, որ հաջողվել է համաձայնեցնել. Պուտին

Ռուսաստանի նախագահ Վլադիմիր Պուտինն ասել է, որ երկուշաբթի օրը Սոչիում իր ադրբեջանցի գործընկեր Իլհամ Ալիևի և Հայաստանի վարչապետ Նիկոլ Փաշինյանի հետ բանակցություններից հետո համաձայնեցվել է համատեղ հայտարարություն։

«Մեր ընդհանուր կարծիքով` օգտակար հանդիպում էր։ Կարծում եմ` որոշ սկզբունքային հարցերի առումով և ապագա պայմանավորվածությունների համար ստեղծվել է շատ լավ մթնոլորտ։ Այսօր մենք համատեղ հայտարարություն ենք համաձայնեցրել, բայց անկեղծ լինեմ` ամեն ինչ չէ, որ հաջողվել է համաձայնեցնել։ Որոշ բաներ ստիպված ենք եղել հանել նախնական տեքստից։ Այս հանդիպումը հնարավորություններ է ստեղծում առհասարակ իրավիճակի կարգավորման ուղղությամբ հետագա քայլերի համար։ Ասելով առհասարակ` նկատի ունեմ և՛ վերջին իրադարձությունները, որոնք տեղի ունեցան, և՛ նաև 2 տարի առաջվանը, որի ժամանակ այնուամենայնիվ մեզ հաջողվեց որոշ հարցերի շուրջ պայմանավորվել»,- ասել է ՌԴ ղեկավարը։

Նա նշել է, որ Ռուսաստանի Դաշնությունը, Հայաստանը և Ադրբեջանը ցույց են տվել ապագայի շուրջ պայմանավորվելու կարողություն։ «Այսօրվա քննարկումը հուշում է, որ մենք կարող ենք նաև բանակցել մեր բոլոր երկրների ապագայի մասին: Երբ ասում եմ մեր բոլոր երկրները, ես նկատի ունեմ Ռուսաստանը, Ադրբեջանը, Հայաստանը և տարածաշրջանի բոլոր երկրները: Որովհետև բոլոր ժողովուրդները, որոնք ապրում են այս տարածքում, շահագրգռված են հարաբերությունների կարգավորմամբ»,- ասել է Պուտինը։

Ռուսաստանի Դաշնությունը կանի ամեն ինչ Հայաստանի և Ադրբեջանի միջև վերջնական կարգավորման հասնելու համար, ընդգծել է նա։

«Ինչպես պայմանավորվել ենք, մենք կապի մեջ կլինենք, մենք կշարունակենք այս երկխոսությունը և կշարունակենք փնտրել այն լուծումները, որոնք անհրաժեշտ են այս երկարատև հակամարտությանը վերջ դնելու համար»,- ասել է ՌԴ ղեկավարը։