2022-ը տապալած Քերոբյանը նոր «ռեկորդների» է պատրաստվում

Վերլուծական 1 Նոյեմբեր, 2022 20:51

Ազգային ժողովում 2023 թվականի պետական բյուջեի նախագծի քննարկման ընթացքում էկոնոմիկայի նախարար Վահան Քերոբյանը հայտարարեց, որ 2023 թվականին թիրախավորում են 7 տոկոս տնտեսական աճ ունենալ: «Դա մեր ժողովրդին խոստացած նվազագույն տնտեսական աճն է», - ասաց նա: Քերոբյանը սակայն մոռանում է, որ ժողովրդին խոստացած նվազագույն տնտեսական աճը պետք է երկնիշ լիներ. չլինելու դեպքում էլ ինքը` Քերոբյանը, պետք է հրաժարական ներկայացներ:

Մյուս կողմից հասկանալի չէ, թե ինչու է նախարարությունը թիրախավորում 7 տոկոս տնտեսական աճ, երբ նույն ԿԲ-ն հայտարարում է, որ այն լավագույն դեպքում լինելու է 4.5 տոկոսի սահմաններում:

Քերոբյանը նաև բողոքում է, որ Հայաստանի տնտեսության արտադրողականությունը բավական ցածր է։ Մինչդեռ հենց ինքն էր ամիսներ առաջ հայտարարում, որ տնտեսությունը եռում է: Ինչպես է հնարավոր եռալ ունենալով ցածր արտադրողականություն՝ մեծ հարց է, իհարկե:

Քերոբյանի մյուս հայտարարությունը նույնպես ուշադրության կարիք ունի: Նա, մասնավորապես, նշել է, որ «Ամեն տարի խաղողի մթերման ժամանակ փոթորիկի միջով ենք անցնում»: Մինչդեռ քանի անգամ է հենց ինքը` Քերոբյանը, հայտարարել, որ խաղողի մթերման խնդիրները կլուծվեն և գյուղացիները այլևս որևէ խնդրի առջև չեն կանգնի:

Իսկ, ընդհանրապես, ինչ արդյունքի է հասել Քերոբյանի ղեկավարած կառույցը վերջին մեկ տարում: Տնտեսությունը փաստացի աճել է միայն թղթի վրա, քանի որ հպարտ քաղաքացիները իրենց գրպանների վրա որևէ կերպ այդ աճը չեն զգում, ավելին` գնաճը գնալով ահագնանում է: Հորդացող ներդրումների որևէ պաշտոնական թիվ այդպես էլ հանրությանը չներկայացվեց, որպեսզի հորդացածի մասին համապարփակ պատկերացում կազմեինք, սակայն, ակնհայտ է, որ ներդրողները ՀՀ սահմանների մոտ հերթ չեն կազմել այստեղ ներդրումներ անելու համար: Այս ընթացքում հիմնովին տապալվեց տնտեսության առանցքային ճյուղերից մեկը՝ գյուղատնտեսությունը, իսկ պետությունը գյուղացուն օգնության ձեռք մեկնելու փոխարեն վերջինիս համար նոր հարկեր սահմանեց: Գրեթե ոչինչ չարվեց պարարտանյութի աստղաբաշխական գինը նվազեցնելու ուղղությամբ, սուբսիդիաներն էլ տրվեցին ոչ թե գյուղացիներին, այլ այդ պարարտանյութը ներկրող օլիգարխներին:

Ինչպես հասկանում ենք` 2022-ը տապալած Քերոբյանը ոչ միայն հերքում է ինքն իրեն` հակասական հայտարարություններ անելով, այլև 2023-ի համար էլ առաջ է քաշում անիրատեսական նշաձողեր: