«Հայաստան» հիմնադրամի կանոնադրությունից փորձել են հանել Արցախի Հանրապետությունը. Բեգլարյանը դեմ է եղել

«Հայաստան» հիմնադրամի կանոնադրությունից փորձել են հանել Արցախի Հանրապետությունը։ Այս մասին ամփոփիչ ասուլիսում ասաց Արցախի պետնախարար Արտակ Բեգլարյանը։

Նշենք, որ շրջանառվող լուրերի համաձայն՝ «Հայաստան» համահայկական հիմնադրամի հոգաբարձուների տարեկան ժողովի ժամանակ քննարկվել է կանոնադրության փոփոխության հարցը, առաջարկ է եղել կանոնադրությունից հանելու «Արցախի Հանրապետություն» բառակապակցությունը, ինչին ընդդիմացել է Բեգլարյանը և փոփոխությունները չեն կատարվել։

Լրագրողի հարցին՝ պետնախարարից ազատումը կապ ունի ժողովի ընթացքում դրսևորած պահվածքի հետ՝ Բեգլարյանը չցանկացավ իր՝ պաշտոնը թողնելը կապել դրա հետ։

«Չէի ցանկանա նման կապ տալ։ Իրականում Դուք գիտեք, թե ինչու եմ ես թողնում պետնախարարի պաշտոնը։ Դա նախագահի որոշումն է, որ Ռուբեն Վարդանյանին պետք է նշանակի Պետական նախարար, երբ Ռուբեն Վարդանյանը պատրաստակամություն է հայտնել ստանձնելու այդ պարտականությունները, բնականաբար, նախագահի կողմից այդ որոշումը կայացվել է։ Կարծում եմ՝ սա պայմանավորված է միայն նախագահի և Ռուբեն Վարդանյանի որոշումներով»,- նշեց Բեգլարյանը՝ հավելելով, որ ողջունում է այդ որոշումը, քանի որ Վարդանյանը միջազգային մակարդակի կառավարման տասնամյակների մեծ հաջողված փորձ ունի։

Ինչ վերաբերում է «Հայաստան» համահայկական հիմնադրամի վերաբերյալ քննարկումներին, Բեգլարյանը հաստատեց, որ նմանատիպ քննարկումներ, խնդիրներ եղել են, ինքը կանոնադրության շուրջ գրավոր ներկայացրել է իր առաջարկությունները՝ որպես հոգաբարձուների խորհրդի անդամ։

«Այդտեղ ներկայացված է նաև Արցախի Հանրապետության նշման հիմնավորումները, փաստարկները, չնշելու ռիսկերը և մի շարք այլ հիմնարար փոփոխություններ, որոնք, կարծում եմ, պետք է կատարվեն կանոնադրության մեջ»,- նշեց Բեգլարյանը՝ հավելելով, որ իր գործունեության մեջ միշտ առաջնորդվել է բարեխղճության, իր արժեքների և սկզբունքներով, ազգային շահերով, մնացածը՝ իրեն չի հետաքրքրում։