Եթե Ադրբեջանը ցանկանում է կայուն խաղաղություն, պետք է արձանագրի, որ միակողմանի շահավետ լուծումներ չեն կարող. Միրզոյան

Բոլոր այն ուղղություններում, որոնց շուրջ Հայաստանը բանակցում է Ադրբեջանի հետ, հանդիպում է Ադրբեջանի մաքսիմալիստական դիրորոշմանը: Այս մասին հայտարարեց ՀՀ արտգործնախարար Արարատ Միրզոյանը ԱԺ մշտական հանձնաժողովների համատեղ նիստում՝ 2023 թ պետբյուջեի նախագծի քննարկմանը:

«Երկու արձանագրում կարող եմ անել՝ մեկը՝ լավ, մյուսը՝ վատ: Վատն այն է, որ բոլոր ուղղություններում, որոնց շուրջ մենք բանակցում ենք Ադրբեջանի հետ, հանդիպում ենք Ադրբեջանի մաքսիմալիստական, առավելապաշտական դիրքորոշումներին: Իմ տպավորությունն այն է, որ Ադրբեջանը, համարելով, որ ռազմական հաջողություններ է ունեցել, այժմ կարող է ինչ-որ պայմաններ թելադրել Հայաստանին: Դա իհարկե, չի կարող իրականություն լինել: Եվ երկարատև, համապարփակ և կայուն խաղաղության հնարավոր չէ հասնել այս ճանապարհով»,-ասաց Միրզոյանը:

Նա հույս հայտնեց, որ Ադրբեջանում սա ժամանակի ընթացքում ավելի հստակ կհասկանան:

«Եվ, եթե Ադրբեջանը ցանկանում է, շահագրգիռ է ունենալ կայուն խաղաղություն Հարավային Կովկասում, ապա պետք է որոշ հարցերում ինքը ևս արձանագրի, որ միակողմանի շահավետ լուծումներ չեն կարող լինել»,-ասաց ԱԳ նախարարը:

Միրզոյանի գնահատմամբ՝ դա չի աշխատի, երկարաժամկետ չի լինի:

Անդրադառնալով լավ արձանագրմանը՝ ԱԳ նախարարը նշեց, որ կա միջազգային հանրության հստակ ուշադրություն՝ հարաբերություններում առկա խնդիրների առնչությամբ: «Երբ նաև ժամանակային վերլուծություն ենք կատարում, տեսնում ենք, որ այդ ուշադրությունն առայժմ գնալով ավելի ու ավելի է մեծանում: Հատկապես սեպտեմբերի 13-14-ի ադրբեջանական ագրեսիայից հետո միջազգային հանրությունը շատ հստակ ուղերձ հղեց Ադրբեջանին այն մասին, որ ուժի կիրառումը, ուժի կիրառման սպառնալիքը չի կարող լինել հարցերի լուծման ճանապարհ», - ասաց նախարարը:

Միրզոյանը հույս հայտնեց, որ այս ուղերձը Ադրբեջանում շատ լավ կհասկանան, կան կանոններ, գծեր, որոնք չպետք է հատվեն: Միրզոյանի տպավորությամբ՝ դա է միջազգային հանրության ուղերձը: