«Արևմտյան պետությունների գործողություններն՝ ուղղված ՀԱՊԿ անդամ երկրներում ռազմաքաղաքական իրավիճակի ապակայունացմանը, լուրջ սպառնալիք են»․ ՀԱՊԿ գլխավոր քարտուղարի տեղակալ

ՀԱՊԿ գլխավոր քարտուղարի տեղակալ Վալերի Սեմերիկովը մասնակցել է ԱՊՀ անդամ երկրների անվտանգության խորհուրդների քարտուղարների հանդիպմանը, տեղեկացնում է Կազմակերպության մամուլի ծառայությունը։

Ողջույնի խոսքում Սեմերիկովը նշել է, որ ընթացիկ ժամանակաշրջանը լուրջ փորձություններով լի է եղել ԱՊՀ երկրների համար։

ՀԱՊԿ գլխավոր քարտուղարի տեղակալն անվտանգության լուրջ սպառնալիքներից է համարել «արևմտյան պետությունների գործողություններն՝ ուղղված ՀԱՊԿ անդամ երկրներում ռազմաքաղաքական իրավիճակի ապակայունացմանը»։

Ըստ Սեմերիկովի՝ արդիական է մնում նաև ահաբեկչության, թմրանյութերի ապօրինի շրջանառության, անօրինական միգրացիայի, հեռահաղորդակցության տեխնոլոգիաները հանցավոր նպատակներով օգտագործելու դեմ ուղղված պայքարը։

«Ժամանակակից իրականությունում կարևոր խնդիր է նաև ՀԱՊԿ անդամ պետությունների կենսաբանական անվտանգության ապահովումը»,- նշել է Սեմերիկովը։

Նա հավելել է, որ խաղաղության ու կայունության ամրապնդման նպատակով անհրաժեշտ է ընդլայնել նաև ՀԱՊԿ-ի միջազգային կապերը, ավելի սերտ փոխգործակցել ԱՊՀ-ի և Շանհայի համագործակցության կազմակերպության հետ՝ հեռանկարում չբացառելով ՀԱՊԿ շրջանակում այդ տարածաշրջանային կազմակերպություններին գործընկերոջ կամ դիտորդի կարգավիճակի շնորհումը։