Ստոլտենբերգը հայտարարել է Շվեդիային և Ֆինլանդիային ՆԱՏՕ-ի կազմում ընդունելու պատրաստակամության մասին

Ֆինլանդիան և Շվեդիան պատրաստ են անդամակցել ՆԱՏՕ-ին, քանի որ կատարել են Թուրքիայի բոլոր պահանջները, հայտարարել է ՆԱՏՕ-ի գլխավոր քարտուղար Յենս Ստոլտենբերգը։ Թուրքիան պատասխանել է, որ երկրի իշխանությունները չեն հավատում, որ Հելսինկին և Ստոկհոլմը կատարել են պայմանավորվածությունները։ Սկզբում Անկարան հրաժարվում էր աջակցել պետությունների մուտքին դաշինք՝ պահանջելով նրանց արտահանձնել այն խմբավորումների անդամներին, որոնք իրենք համարում են ահաբեկիչներ։

Շվեդիան և Ֆինլանդիան կատարել են ՆԱՏՕ-ին անդամակցելու Թուրքիայի բոլոր պահանջները, այժմ ժամանակն է նրանց ընդունել դաշինք, հայտարարել է ՆԱՏՕ-ի գլխավոր քարտուղար Յենս Ստոլտենբերգը, փոխանցում է Reuters-ը։ «Եկել է ժամանակը ողջունելու Ֆինլանդիային և Շվեդիային որպես ՆԱՏՕ-ի լիիրավ անդամներ: Այս վտանգավոր ժամանակներում էլ ավելի կարևոր է ավարտին հասցնել նրանց մուտքը՝ Մոսկվայում թյուրիմացություն կամ սխալ հաշվարկ թույլ չտալու համար»,- ասել է Ստոլտենբերգը Ստամբուլում Թուրքիայի արտգործնախարար Մևլութ Չավուշօղլուի հետ մամուլի ասուլիսում։

Սակայն Չավուշօղլուն, ի պատասխան սրան, ասել է, որ Ստոկհոլմն ու Հելսինկին դեռ չեն կատարել Թուրքիայի հանդեպ իրենց բոլոր պարտավորությունները, նրանցից կոնկրետ քայլեր են սպասվում։ Թուրքական կառավարության անանուն աղբյուրները Bloomberg-ին հայտնել են, որ Թուրքիան դժվար թե հավանություն տա Շվեդիայի անդամակցությանը ՆԱՏՕ-ին այս տարի, նույնիսկ հաջորդ տարի՝ հունիսին կայանալիք նախագահական և խորհրդարանական ընտրություններից առաջ (քվեարկությունը կարող է անցկացվել ավելի վաղ): Զրուցակիցների կարծիքով՝ Շվեդիան բավականաչափ չի արել Թուրքիայի պահանջները բավարարելու համար։ Միաժամանակ Թուրքիան գոհ է Ֆինլանդիայի հետ համագործակցությունից, սակայն նախատեսում է միաժամանակ հաստատել ՆԱՏՕ-ին միանալու նրանց հայտերը։