Մենք գիտենք, որ Հայաստանը կառուցողական է տրամադրված. Էրդողանի խոսնակ

Թուրքիայի նախագահի մամուլի խոսնակ Իբրահիմ Քալընը հարցազրույցի ընթացքում անդրադարձ է կատարել հայ-թուրքական հարաբերություններին։

Թուրքական CNNturk-ի փոխանցմամբ, Թուրքիայի նախագահի մամուլի խոսնակը նշել է, որ Հայաստանի հետ հիմնական խնդիրը եղել է Ղարաբաղի հարցը։ Նրա խոսքով՝ «արդեն այդ հարցը լուծվել է»։

Քալընը հիշեցրել է, որ արդեն տեղի է ունեցել Փաշինյան-Էրդողան հանդիպումը եւ Թուրքիան գիտի, որ Հայաստանը հարաբերությունների կարգավորմանը կառուցողական է տրամադրված։

«Տա Աստված, կտեսնենք այդ օրերը, որ Հայաստանը և Ադրբեջանը մնայուն խաղաղության պայմանագիր են ստորագրել, հասել են մի համաձայնության, որում Ղարաբաղի հայերի խնդիրները, ներառյալ բոլոր խնդիրները, լուծվել են, և տա Աստված, որ մոտ ժամանակներս կտեսնենք նաև այն օրերը, որ մենք էլ մեր հարաբերությունները կարգավորվել ենք, սահմանը բացել ենք, սահմանային առևտուր, գնալ-գալ կա և այլն։ 

Սա Հայաստանի համար էլ լավ բան է, Հայաստանի ժողովրդի համար էլ, Թուրքիայի քաղաքացի հայերի համար էլ: Սփյուռքի համար էլ է լավ: Ցավոք, գուցե սա ամենաուշը Ամերիկայի ու Ֆրանսիայի համայնքները հասկանան, քանի որ գիտեք՝ աշխարհում 2 մեծ հայկական սփյուռք կա, մեկը՝ Ֆրանսիայում, մյուսը՝ ԱՄՆ-ում: Հույս ունեմ նրանք էլ սա կհասկանան, քանզի տեսեք՝ Հայաստանը 2.5-3 մլն բնակչությամբ դեպի ծով ելք չունեցող ցամաքային պետություն է, որի ամենակարևոր ելքը Թուրքիան է: Դրանից նա կշահի առևտրի տեսանկյունից: Ադրբեջանի հետ առևտուր կանի, մեզ հետ առևտուր կանի, մարդիկ կգնան-կգան, Հայաստանի ժողովուրդն էլ շունչ կքաշի: Սա ներդրում կլինի ամբողջ տարածաշրջանի խաղաղությանը: Ես հույս ունեմ, որ առաջիկա օրերին ավելի լավ, ավելի դրական ու ավելի պոզիտիվ քայլեր կկատարվեն»,- ասել է նա: