Կուսումնասիրեն արդյոք պատկան մարմինները ՔՊ-ական համայնքապետերի՝ միլիոնների հասնող եկամուտները

Հեղափոխության օրերին Նիկոլ Փաշինյանը և իր թիմակիցները փորձում էին ստեղծել այնպիսի տպավորություն, որ իրենք էլ հասարակ, քյասիբ հեղափոխականներ են՝ մի կերպ վարկերով գոյատևող, ասել է թե՝ մեկն են ժողովրդից:  2018 թվականին գուցե և իրոք այդպես էր, որովհետև մի շարք պաշտոնյաների հայտարարագրեր, իրոք, արտացոլում էին վերցրած վարկերը: Թե որքանով էին նրանցով գոյատևում այդ անձինք՝ դժվար է ասել, սակայն հեղափոխությունը կտրուկ փոխեց նրանց սոցիալ-տնտեսական վիճակը:

Ամիսներ առաջ ՔՊ ցուցակով համայնքապետ ընտրված մի շարք պաշտոնյաների հայտարարագրեր որոշակի հարցեր են առաջացնում և տպավորություն է ստեղծվում, որ վերջիններս այնքան էլ թափանցիկ չեն հանրության առաջ սեփական եկամուտները և դրանց աղբյուրները ներկայացնելու հարցում: Մյուս կողմից էլ ակնհայտ է դառնում, որ պաշտոնը զգալիորեն ազդել է վերջիններիս սոցիալական դրության բերալավման վրա:

Դիցուք՝ Աշտարակի երկարամյա քաղաքապետ Թովմաս Շահվերդյանը, ով, սակայն, վերջին ՏԻՄ ընտրություներին ստացավ ՔՊ-ի անվերապահ աջակցությունը, կանխիկ դրամ է  հայտարարագրել` 7,000,000.00 ՀՀ դրամ և 9,000.00 ԱՄՆ դոլար: Սա մի դեպքում, երբ աշխատանքից ստացված եկամուտը 3,722,101.00 ՀՀ դրամ է, բանկային հաշվի մնացորդն էլ՝ 8,053,071.00 ՀՀ դրամ: Այս դեպքում այնքան էլ հասկանալի չէ, թե որտեղից վերը նշված 9,000.00 ԱՄՆ դոլարը, այդ գումարի ծագման և աղբյուրների մասին տեղեկություն չկա:

Արարատի համայնքապետ ընտրված Ասլան Ավետիսյանը հայտարարագրել է 38,590,000.00 դրամի չափով բաժնետոմս, սակայն թե որ ընկերությունում 99.33 տոկոսի հասնող բաժնեմասնակցություն ունի Ավետիսյանը՝ հանրությանը չի ներկայացվել: 2020 թվականին նրա եկամուտները կազմել են ընդամենը 300,220.00 դրամ, իսկ կանխիկ դրամը՝ 10,000,000.00:

Վայքի համայնքապետ ընտրված Մխիթար Մաթևոսյանի կյանքը նույնպես բարելավվել է: 2021 թվականին վերջինս ձեռք է բերել MERCEDES-BENZ մակնիշի ավտոմեքենա: Կանխիկ դրամը կազմել է 40,000,000.00 դրամ:

Դիլիջանի համայնքապետ Դավիթ Սարգսյանը, իր հայտարարագրի համաձայն, 2021 թվականին 10 միլիոն դրամով անշարժ գույք է վաճառել: Սակայն եկամուտներ բաժնում՝ գույքը (բացառությամբ դրամական միջոցների) օտարելուց ստացված եկամուտը 2,500,000.00 ՀՀ դրամ է: 

Իջևանի համայնքապետ ընտրված Արթուր Ճաղարյանի եկամուտները 2020 թվականին, ըստ իր պաշտոնական հայտարարագրի, կազմել են 1,320,081.00 դրամ: 2021-ին եկամուտները աճել են՝ հասնելով 5,491,157.00 դրամի, դրան էլ գումարած 9,089,001.00 դրամի փոխառությունը:

Մեծամորի համայնքապետ ընտրված Վահրամ Խաչատրյանը 2021-ին 50,131,066.00 դրամի բնակարանի գնման իրավունք է ստացել: Վերջինս հայտարարագրել է նաև 80 հազար եվրո և 40 հազար ԱՄՆ դոլար: Եկամուտները կազմել են 4,818,149.00 դրամ: Համեմատության համար նշենք, որ 2020 թվականին վերջինիս եկամուտները կազմել են 2,983,262.00 դրամ:

Ի դեպ,  ՀՀ կոռուպցիայի կանխարգելման հանձնաժողովն ուշագրավ որոշում է կայացրել, որը խառնաշփոթ է ստեղծել պետական պաշտոն զբաղեցնող անձանց շրջանում: Մասնավորապես, ըստ լրատվամիջոցներում հայտնված տեղեկության՝  հանձնաժողովը որոշել է վերլուծել պետական պաշտոն զբաղեցնող անձանց եւ նրանց ընտանիքների անդամների՝ 2021 թվականի տարեկան հայտարարագրերը, ինչպես նաեւ 2022 թվականի պաշտոնեական պարտականությունները ստանձնելու, դադարեցնելու հայտարարագրերը: Հետաքրքիր է՝ ինչ կալիբրի չինովնիկներ են հայտնվելու հանձնաժողովի ուշադրության կիզակետում և կլինեն նրանց շարքում արդյոք կարկառուն ՔՊ-ականներ, թե կբավարարվեն միայն «մանր ձկներին» ջրի երես հանելով...