Շվեդիայի կառավարությունը որոշել է հեռավորություն պահպանել քուրդ զինյալներից՝ ՆԱՏՕ-ին միանալու համար

Շվեդիայի նոր կառավարությունը հեռավորություն կպահի քրդական աշխարհազորից (YPG), քանի որ փորձում է ստանալ Թուրքիայի հավանությունը ՆԱՏՕ-ին միանալու համար, Շվեդիայի ռադիոյին ասել է Շվեդիայի արտաքին գործերի նախարար Թոբիաս Բիլստրյոմը։

«Այս կազմակերպությունները սերտ շփումներ ունեն Քրդական բանվորական կուսակցության հետ, որը ԵՄ ահաբեկչական կազմակերպությունների ցուցակում է։ Մեզ համար կարևոր է, որ երկիմաստ շփումներ չլինեն։ Շվեդիայի համար կարևոր է հեռավորություն պահպանել այդ կազմակերպություններից։ Մենք լավ հարաբերություններ ենք ուզում Թուրքիայի հետ»,- ասել է Բիլստրյոմը։

Այս հայտարարությունն արվել է Շվեդիայի վարչապետ Ուլֆ Կրիստերսոնի՝  նոյեմբերի 8-ին Անկարա կատարելիք այցի նախաշեմին։ Հենց այդ այցի շրջանակում նախատեսվում են բանակցություններ Թուրքիայի նախագահ Ռեջեփ Թայիփ Էրդողանի հետ՝ քննարկելու Շվեդիայի՝ ՆԱՏՕ-ին անդամակցության դիմումը վավերացնելու հարցը։

Թուրքիան խոստացել է արգելափակել ՆԱՏՕ-ին անդամակցելու Շվեդիայի հայտը, եթե Ստոկհոլմը չդադարեցնի զինված խմբավորմանն աջակցելը։ 

Շվեդիան և Ֆինլանդիան ՆԱՏՕ-ին անդամակցելու հայտ են ներկայացրել այս տարվա սկզբին՝ ուկրաինական հակամարտության ֆոնին: Դիմումը հավանության է արժանացել դաշինքի 30 երկրներից 28-ի կողմից։ Սկանդինավյան երկրներն ակնկալում են, որ Թուրքիան և Հունգարիան կհրաժարվեն իրենց առարկություններից:

Միևնույն ժամանակ, Թուրքիան և ՆԱՏՕ-ի ղեկավարությունը դեռևս համաձայնության չեն եկել Ֆինլանդիայի և Շվեդիայի ընդունման ժամկետների շուրջ։ Թուրքական կողմը նշել է, որ չի ցանկանում դանդաղեցնել նոր անդամներ ընդունելու գործընթացը, մանավանդ, որ երկու երկրներն էլ հանել են էմբարգոն և շտկել իրենց օրենսդրությունը, սակայն պետք է կատարեն ահաբեկչության դեմ պայքարելու իրենց բոլոր պարտավորությունները։